اسلامي امارت د پاکستاني چارواکو وروستیو تورونو ته په غبرګون کې ویلي تورونه د حل لاره نه ده او پاکستان دې د نا امنیو حل په خپل هېواد کې ولټوي.
د اسلامي امارت له لورې په خپره شوې خبرپاڼه کې ویل شوي، په پاکستان کې له وروستیو امنیتي پېښو وروسته یو ځل بیا پاکستاني چارواکو د خپل هېواد د امنیت د ټینګښت پر ځای د پړې ګوته افغانانو ته نیولې ده.
خبرپاڼه کې ویل شوي چې اسلامي امارت دغه تورونه په بشپړ ډول ردوي او پاکستاني مسوولینو ته وریادوي چې افغانستان له اوږدو جګړو راوتلی هېواد دی او په بل هېڅ هېواد او په ځانګړې توګه ګاونډیو هېوادونو کې نا امني نه غواړي.
د اسلامي امارت ویاند ذبیح الله مجاهد پر خپله ټویټر پاڼه لیکلي، افغان خاوره به د هېڅ هېواد پر خلاف ونه کارول شي، خو دا په دې مانا هم نه ده چې افغانستان د سیمې د هر هېواد د امنیتي ناکامۍ مسوول وي.
مجاهد ویلي، پاکستان باید له خپل امنیتي وضعیت سره دقیق چلن وکړي او په خپل کور کې يې حل وپلټي.
ذبیح الله مجاهد زیاته کړې، په تېر کال کې په افغانستان کې په بېلابېلو عملیاتو کې تر ۱۸ تنو پاکستاني داعش وسله وال وژل شوي چې په افغان خاوره کې یې چاودنې او بریدونه کول او لسګونه نور ژوندي نیول شوي دي چې ټول اسناد او شواهد یې شته.
د نوموړي په وینا تورونه لګول د حل لار نه ده، او د داعش پر وړاندې باید پر ګډه مبارزه وشي.
د مجاهد په خبره، پاکستان کې د هيڅ برید طرفدار نه دي او هیچا ته اجازه نه ورکوي چې د افغانستان خاوره د پاکستان پر ضد وکاروي، خو د پاکستان په خاوره کې دننه د بریدونو مخنیوی او کنترول د اسلامي امارت دنده نه ده او پاکستان دې د خپلو خلکو او نړیوالو ذهنیت بدلولو لپاره افغانستان نه تورنوي.
