د پاني پت په نامه خپرېدونکي هندي فلم د افغانانو غبرګونونه راپارولي دي.
په ټولنیزو رسنیو کې یو شمېر افغانانو په یاد فلم کې د احمدشاه ابدالي د رول په تړاو اندېښنه ښودلې او باور کوي چې په دغه فلم کې به تاریخ جعل شوی وي.
هند کې د افغانستان د سفارت کارکوونکي وايي، د فلم د محتوا په تړاو د مالوماتو پر ترلاسه کولو نه دي بریالي شوي، خو د فلم کمپنۍ ډاډ ورکړی چې دغه فلم پر تاریخي واقعیتونو جوړ شوی دی.
د هندي سینما له لوري د پښتون پاچا علاء الدین غلجي په کیسه د جوړ شوي فلم وروسته اوس د پاني پت په نوم د فلم لنډې صحنې خپرې شوي چې د احمد شاه بابا او مرهټیانو تر منځ خطرناکه جګړه یې انځور کړې ده.
په فلم کې سنجی دت د احمد شاه بابا رول لوبولی دی چې په قهرجن حالت کې راڅرګندېږي او مرهټیان پکې مېړني بلل شوي دي.
په ټولنیزو رسنیو کې د یاد فلم په تړاو ځینې افغانان د احمد شاه ابدالي د رول او د تاریخ د جعل په تړاو اندېښنه لري، خو ځيني ویاړي چې د ابدالي په څېر اتل لري چې اوس یې په تړاو فلم جوړېږي.
ظریف امینیار داسې ویلي دي (( زه پوهېږم چې هندیان احمد شاه بابا ته متجاوز وايي او طبعاً چې فلم به یې د خپلو ملي ګټو پر اساس جوړ کړی وي؛ لکه د علاء الدین غلجي په اړه یې چې جوړ کړی و. خو زه بیا هم خوښ یم او ویاړ کوم چې موږ د ابدالي په څېر یو امپراتور درلوده.))
عنایت الله صافی داسې ویلي (( په دې هيله چې د پاني پت فلم جوړونکى ټيم تاريخ جعل نه کړي؛ ځکه د پاني پت درېمه جګړه د هندوانو لپاره بد حيثيت لري، خو د افغانانو لپاره يو طلايي چانس و.))
اصف عارفي ویلي ((مخکي له دي چي د پاني پت فلم د هند په سینما وښودل شي، تر ښارونو او کورونو ورسېږي؛ افغان دولت باید له هندي چارواکو سره د فلم په کیسه، د احمدشاه بابا په کردار وغږېږي او فلم تر پایه وګوري.))
هند کې د افغانستان سفارت فرهنګي اتشه اجمل عالمزي د خلکو اندېښنو په ځواب کې وايي، د پاني پت په نامه د فلم جوړوونکو ډاډ ورکړی چې یاد فلم کې منفي مسایل نه شته.
عالمزی زیاتوي چې دوی خپلې اندېښنې د هند له اطلاعاتو او نشراتو وزارت سره شریکې کړي چې دوی سره یې تر اوسه مالومات نه دي شریک کړي.
د معاصر افغانستان د بنسټګر احمدشاه ابدالي او مرهټیانو تر منځ په ۱۷۶۱ کال کې د هند د تاریخ ستره جګړه وشوه چې احمدشاه بابا پکې پر مرهټیانو بریالی شو
دا جګړه په ۱۷۶۱م کې وشوه چې احمدشاه ابدالي وګټله. د پاني پت جګړه د هند په تاریخ کې یوه لویه جګړه بلل کیږي چې هندي روهیله پښتنو او مشرانو یې هم د احمد شاه بابا ملاتړ کاوه.
