د ټرافیکو عمومي رياست د يوې تازه پرېکړې له مخې په ټول هېواد کې د سورليو وړلو لپاره د شخصي موټرو کارول منع کړل.
د دغه ریاست له لوري په خپره شوې اعلاميه کې راغلي، له يادې پرېکړې يې موخه د ښاري نظم ټينګول، ټرافيکي مديريت او د موټرو قانوني فعاليت عامل دي.
د ترافیکو ریاست چارواکي وايي، د ټکسي په توګه موټرو ته د فعاليت جوازونو د وېش له پيل راهيسې په ټولو ولايتونو کې سلګونه زره جوازونه وېشل شوي.
د دوی په خبره، يوازې په کابل کې۴۰ زره شخصي او شرکتي موټرو ته د ټکسي جوازونه وېشل شوي دي.
دوی زیاتوي، د ټکسي جواز اخيستلو او د موټرو رنګولو په برخه کې يې خلکو ته لازمې اسانتياوې برابرې کړې دي.
د ټرافيکو عمومي رياست د ښوونې او روزنې مدير عبدالودود خیرخوا وايي: « په دې اړه باید ووایم چې د ټکسي د امر ورکولو له پيل راهیسې د ټول هېواد پر کچه تقریبا ً له ۱۰۰ زرو پورته ښاري نقلیه وسایطو ته د ټکسي اسناد ورکړل شوي چې له ډلې یې تر ۴۰ زرو زیات په کابل ښار کې دي. د ټکسي امر اخیستونکي کس لپاره هېڅ ډول ستونزه نه شته، یوازې باید ترافیکو ریاست ته راشي، عریضه وکړي او خپل کارونه طی مراحل کړي. په دویمه ورځ کولی شي د ټکسي امر واخلي.»
په ورته وخت کې يو شمېر ټکسي چلوونکي وايي، د ټکسي جواز اخيستلو او د موټر پر رنګولو يې زياتې پيسې ولګولې، خو د ياد رياست له لوري ورته مناسب تم ځايونه نه دي جوړ شوي.
ټکسي چلوونکی محمد اکبر وايي: « اقتصادي وضعیت ښه نه دی، خو بیا هم که څوک وغواړي کار شته دی. موږ په ښار کې ځانګړي تم ځایونه نه لرو او ترافیک مو ځوروي.»
ټکسي چلوونکی هارون وايي: « له حکومت غوښتنه کوم چې ټکسي موټر ته ځانګړی ځای ورکړي. زه د ارزان قیمت او فروشګاه په لین موټر چلوم، هلته شخصي او ټکسي دواړه کار کوي.»
له بلې خوا، په کابل ښار کې د شخصي موټرو چلوونکي وايي، اقتصادي ستونزې يې د دې سبب شوې چې د ټکسي جواز ترلاسه نه کړي.
دوی زياتوي، د کمو عايدو له امله نه شي کولی خپلې ستونزې حل کړي او له سرپرست حکومت د موټر چلونې په برخه کې د همکارۍ غوښتنه کوي.
موټر چلوونکی محمد نسیم وايي: « له حکومت غوښتنه کوو چې د ټکسي امر ورکولو او موټر رنګولو په اړه مراعات وکړي او څه پیسې کمې واخلي. همدارنګه د ټرانسپورټ، ټکس لین او پلېټ په اړه هم زیاتې پیسې اخلي او تمه لرو چې دا لګښتونه راته کم کړي. له یوې خوا بېکاري ده او له بلې خوا دوی ډېرې پیسې اخلي، دا کار سړی ځوروي.»
له دې سره، د کابل اوسېدونکي هم د ټترافيکو رياست د يادې پرېکړې د هرکلي ترڅنګ وايي، د ورته پرېکړو عملي کول د امنيت په لا ټينګښت کې هم مرسته کولی شي.
د کابل اوسېدونکی محمد یاسین وايي: « دا کار له امنیتي پلوه ګټې هم لري، خلک کولی شي په ټکسي موټرو کې په پوره ډاډمنه توګه سفر وکړي، حال دا چې شخصي موټر د باور وړ نه دي.»
د کاري فرصتونو کموالی او اقتصادي ستونزې هغه عوامل دي چې ډېر خلک په شخصي موټرو کې سورليو وړلو ته اړ شي او له دې لارې هڅه کوي چې خپلې کورنۍ تمويل کړي.دا جعلي متن دی. د ډمی مینځپانګې لپاره د ډیفالټ متن مثالونه شتون نلري نو ما باید دا رامینځته کړی وي. دا ستاسو د خپل مینځپانګې سره بدل کړئ.
