له طبیعي پیښو سره د مبارزې چمتووالي ملي ادارې سرپرست ملا نور الدین ترابي وايي، په مسکو کې د افغان بېزنس سنټر له لوري له دغې ادارې سره د ۵۵ ټنه خوراکي توکو مرسته وشوه چې دوی به یې پر اړمنو خلکو ووېشي.
د ترابي په خبره، په شویو مرستو کې ۲۵ ټنه اوړه ، ۲۵ ټنه وریجې او ۵ ټنه یې غوړي دي.
ترابي په دې اړه وايي:« په مسکو کې د افغان بېزنس سنټر مالک چې افغان سوداګر دی، حاجي نادر شاه نومېږي، نور وختونه یې هم زموږ له ادارې سره بار بار د مسکینانو، یتیمانو او غریبو خلکو لپاره مرستې کړې. خدای (ج) دې خیر ورکړي، موږ یې شکریه ادا کوو، نن بیا ۲۵ ټنه وریجې، ۲۵ ټنه غنم او ۵ ټنه غوړي دي چې اوس یې راته تسلیم کو. په موټرو کې راغلي، موږ یې دلته په خپلو ګودامونو کې ځای پر ځای کوو. انشا الله د دوی له خوښې سره سم یې بیا موږ مسکینانو ته، په ښه سرعت او شفافیت سره وېشو.»
په ورته مهال ترابي وايي، ټولو ولایتونو ته یې له مستحقو کورنیو سره د مرستې په موخه خوراکي توکي لېږلي چې زرګونو ټنو ته رسیږي.
هغه زیاتوي، هڅه یې د اده چې مرستې راجلب او په پوره روڼتیا سره یې مستحقو افغانانو ته ورسوي.
ترابي په دې اړه وايي:« الحمد الله په ولایتونو کې زموږ له خوا، د موسسو له خوا دا اوس په لږ وخت کې، موږ هر ولایت ته زر پارسله ۲۵ کیلويي وریجې ، ۲ زره پارسله ۵۰ کیلويي غنم واستول. نورې موسسې هم هلته ورسره مرسته کوي.»
افغانستان د هغو هېوادونو په ډله کې دی چې له اقتصادي پلوه پرځان بسیا نه دی او په دې وروستیو کې له ایران او پاکستانه په جبر راویستل شوي افغانان او طبیعي پیښو زیانمنې کړې کورنۍ یې مرستو ته اړتیا لري.
