د کونړ مست او څپاند سیند له لسیزو راهیسې د هېڅ په بدل کې پاکستان ته بهېږي. تازه حکومت پرېکړه کړې چې پر دې سيند به د خلکو له غوښتنې سره سم، د برېښنا توليدولو او اوبو مهارولو بند جوړوي.
عام خلک د دې پرېکړې هرکلی کوي او غوښتنه یې دا ده چې د دې بند تخنيکي او نورې عملي چارې ژر پيل کړي. دوی وايي، د کونړ سيند د اوبو مهارولو لپاره په داوطلبانه توګه مالي مرستې ته هم چمتو دي.
د کابل یو تن اوسېدونکی وايي: « دا ډېره ښه خبره ده او که جوړ شي، د افغانستان لپاره ډېره ستره آبادي ده. اوس مهال افغانستان له هرڅه زیات اوبو ته اړتیا لري.»
د کابل یو بل اوسېدونکی وايي: « دا یوازې زما نه بلکې د ټولو افغانانو غوښتنه ده چې د کونړ اوبه باید مهار شي، ځکه زموږ ځمکې او کرنه اوبو ته اړتیا لري. د افغانستان ټول ولس دېته چمتو دی چې له حکومت سره مرسته وکړي.»
د کابل یو تن اوسېدونکی وايي: « کونړ سیند د افغانستان لپاره ډېر مهم دی. که په دې بند د برېښنا بندونه جوړ شي او اوبه یې له پاکستان را وګرځول شي، افغانستان کې به ډېرو خلکو ته د کار زمینه برابره شي. له دې بند سره به کرنه وده وکړي، برېښنا کوټونه به جوړ شي او ډېرې کارخانې او فابریکې به نورې هم جوړې شي.»
شنونکي هم په کونړ سيند د بند جوړولو پروژه د انرژۍ توليد او د کرنې د ودې لپاره حياتي بولي او ډاډ ورکوي چې د بند د چارو په بشپړېدو سره به افغانستان د انرژۍ او کرنيزو محصولاتو د توليدو په برخه کې پر ځان بسيا شي.
د اقتصادي چارو شنونکی نورالله عزیز وايي: « پر کونړ سیند د برېښنا بند جوړول هغه څه دي چې کولی شي په پراخه پیمانه په افغانستان کې د برېښنا کمبود له منځه یوسي؛ ځکه دا بند یا بندونه دومره ظرفیت لري چې نه یوازې د افغانستان د برېښنا اړتیا ورپوره کوي بلکې د برېښنا صادراتو ته به هم زمینه برابره کړي.»
د اوبو او انرژۍ وزير هم څو مياشتې وړاندې پر کونړ سيند د بند جوړولو خبره شمشاد ته په يوه مرکه کې کړې وه او دا يې هم ويلي و چې د حکومت مشرتابه هم د دې پروژې تطبيق ته په جديت سره لېوال دی.
د اوبو او انرژۍ وزیر عبداللطیف منصور وايي: « موږ اتبدايي مطالعات او سروې ګانې ترسره کړې دي او هلته موږ دوه بندونه جوړ کړي هم دي، خو د ډېرو نورو بندونو جوړولو امکانات هم شته. دا کولی شي تر ۱۲ سوه مېګاواټو پورې برېښنا تولید کړي. کله چې زه دې وزارت ته راغلم، له دوو بهرنیو کمپیونو سره ډېر مخته لاړو او سفرونه وشول. موږ اوس هم هیله لرو؛ په دې برخه کې یو زموږ د اوبو او انرژۍ وزارت عزم او د اسلامي امارت غوښتنه ده چې پوره عزم او اداره شته ده او بله دا چې دا بندونه ډېره پانګه غواړي.»
په خواله رسنیو کې هم د اوبو او انرژۍ وزیر ته منسوب یو غږیز کلیپ لاس په لاس کېږي چې په کې د کونړ پر سيند د بند جوړولو لپاره د حکومت کلک هوډ او له ځينو شرکتونو سره په دې اړه د خبرو يادونه شوې.
