Skip to content
د افغانستان ولسي جرګې یو شمېر پخوانۍ ښځېنه غړو او د ښځو حقونو فعالانو د یوه خبري کنفرانس پر مهال د افغان مېرمنو او نجونو اوسنی او راتلونکی حالت د اندېښنې وړ وباله او په ملګرو ملتونو کې یې له نړیوالو وغوښتل،چې افغان ولس یوازې مه پرېږدئ.
فوزیه کوفي وايي، د افغان ولس یوازې پريښودل،به نه یوازې د افغانستان بلکې ټولې نړۍ ته بدې پایلې ولري.
کوفي زیاته کړه،چې طالبانو سره یې له نږدې خبرې کړي،خو د هغوی حکومتولي یې نه ده لیدلې او د طالبانو د حکومتولۍ په اړه به وخت قضاوت کوي.
کوفي زیاتوي:« طالبان ډېر غواړي،چې په رسمیت وپیژندل شي، ما له هغوی سره مذاکرات کړي دي. هغوی په جګړه کې ډېر ښه دي،خو آیا په حکومتولۍ کې هم ښه دي که نه؟ دا به وخت ثابته کړي. هغوی ډېر د دې تقاضاء لري،چې پر رسمیت وپیژندل شي،ځکه هغوی مرستو ته هم اړتیا لري،ترڅو خلکو ته یې ورسوي.»
په دغه ناسته کې پخوانۍ ډیپلوماټې او مدني فعالې اصیلې وردګ بیا وویل، دا د ټولې نړۍ ګډ مسوولیت دی،چې د افغانستان وضعیت ته پاملرنه وکړي او له ملګرو ملتونو یې هم غوښتنه دا ده،چې په افغانستان کې د پاتې شویو ښځو او ماشومانو حالات درک کړي.
هغې زیاته کړه:« موږ دلته د دې لپاره راغلي یو،چې د نړۍ له مشرانو،نړیوالو بنسټونو او ملګرو ملتونو وغواړو،چې خپل ګډ مسوولیت ادا کړي. تاسې هرڅه زموږ پر اوږه یا د تېر حکومت او یا د طالبانو پر اوږه نه شئ اچولی. دا اوس زموږ د ټولو ګډ مسوولیت دی. په افغانستان کې له ګواښ ډک وضعیت دی، د هغو ښځو او ماشومانو ژوند باید وژغورل شي. زه دا نه وایم چې ټول واېستل شي،خو هغوی چې ډېر تر ګواښ لاندې دي،باید غم یې وخوړل شي.»
هغې له ملګرو ملتونو وغوښتل،چې بشري مرستو ته دوام ورکړي او ژر یې افغانستان ته ورسوي،ځکه ژمی را روان دی او خلک ډېر خوراکي توکو او بشري مرستو ته اړ دي.
په دې خبري کنفرانس کې په ولسي جرګه کې د هرات پخوانۍ غړې ناهید فرید وویل، افغان حکومت باید داسې کسانو ته ورکړل شي،چې د ټولو اقشارو استازولي وکړای شي.
فرید زیاتوي:« دا د نړۍ تاریخ ثابته کړې، د حکومت څوکۍ داسې کس ته باید ورکړل شي،چې د ټولو استازولي وکړای شي،که افغانستان کې وي،باید د ټولو افغانانو استازی حکومت وي.»
ناهید فرید وايي، اوس مهال د طالبانو حکومت د ټولو اقشارو او ډلو استازیتوب نه شي کولای.
افغان ښځې داسې مهال په ملګرو ملتونو کې د هېواد د روان وضعیت په اړه غږیږي،چې وړمه ورځ هم په کابل ښار کې یو شمېر ښځو د لاریون پرمهال له اسلاميامارته نجونو ته د زده کړو او ښځو ته د کار اجازې غوښتنه کوله،چې پر تاوتریخوالي واوښت.
