له اوږدو جنجالونو وروسته بالاخره د ولسمشر غني او مخکیني اجرایه رییس عبدالله عبدالله ترمنځ هوکړه لاسلیک شوه.
د ولسمشریزو ټاکنو له نهايي پاېلو وروسته چې د ټاکنو خپلواک کمیسیون محمد اشرف غني د ټاکنو ګټونکی اعلان کړ او ټاکنیزه وثیقه یې ورکړه د ثبات او همپالنې ټیم مشر عبدالله عبدالله ځان د ټاکنو ګټونکی اعلان کړ او ولسمشر غني سره یې په یو وخت د لوړې مراسم ترسره کړل چې په کور دننه او بهر له نیوکو او اندېښنو سره مل وو.
د زلمي خلیلزاد سربېره مخکني ولسمشر حامدکرزي، جهادي مشر استاد سیاف او کریم خلیلي د ارګ او اجرایه ریاست ترمنځ جوړجاړي لپاره میاشتې منځګړي و او بالاخره ولسمشر غني او عبدالله هوکړه وکړه.
د هوکړې له مخې به عبدالله عبدالله د ملي مصالحې عالي شورا مشر وي او د والیانو او ځینو ادارو لپاره د مشرانو د ګمارنې تر څنګ به کابینه کې نیمه برخه ولري.
هوکړه کې جنرال دوستم ته د مارشالۍ رتبه او د دولت عالي شورا غړیتوب هم منل شوی دی.
دا پریکړه خواله رسنیو کې غبرګونونه لري، خو د ولسمشر لومړی مرستیال وایي، د خلکو په رایو معامله نه ده شوې.
هوکړه کې واکونه او صلاحیتونه واضح شوي دي.
حکومت کې د عبدالله عبدالله ونډه ((د وزارتونو په شمول د کابینې معرفي کې پنځوس سلنه برخه، د ولسمشر د فرمان له مخې سترجنرال عبدالرشید دوستم ته د مارشال اعزازي رتبه او ددولت عالي شورا غړیتوب.
د دواړو لورو د توافق په اساس د ولایتونو والیانو معرفي.
نوماندان به د قانوني شرایطو او ظرفیت له مخې ټاکل کېږي.
د اشخاصو تغیر، تبدیل او عزل به د دلایلو له مخې د ولسمشر له لوري ترسره کېږي.))
که څه هم د کابینې په معرفي کولو کې برخه په منځ نیمه ده خو د دواړو لورو واکونه او صلاحیتونه کم زیات دي.
د هوکړې له مخې د عبدالله عبدالله صلاحیتونه دغه ډول واضیح شوي (( د سولې چارو رهبري. د ملي مصالحې عالي شورا غونډو رهبري. د ملي مصالحې عالي شورا د مقاماتو او د شورا د اجرایوي کارمندانو معرفي کول او مقررول.))
د هوکړې لاسلیک سره سم یو شمېر خلکو د واک ویش باندې نیوکې کړي او اندېښنه یې ښودلې چې د تیر پنځه کلن حکومت تجربې به تکرار شي خو ځینو یې هرکلی کړی چې دغه هوکړه به شته جنجالونه پای ته ورسوي او د سولې خبرو پيل ته به افغانان ور نږدې کړي.
