په ټاکنو د څار بنسټونه نیوکه لري، چې د ټاکنو کمیسیون د زماني مهالویش مهمې برخې هېرې کړي.
د ولسمشریزو ټاکنو لپآره زماني مهالویش تصویب شوی خو تر اوسه یې د بودیجې او امنیت په تړاو وروستي خبرې ندي شوي.
ټاکنو کمېسیون وايي، د ولسمشریزو ټاکنو لپآره عملیاتي پلان جوړوي او له حکومت او نړیوالې ټولنې سره خبرې کوي چې بودیجه ورته برابره کړي.
له دې سره په ټاکنو د څار بنسټونه د ولسمشریزو ټاکنو په زماني مهالویش نیوکې لري چې نیمګړتیاوې لري او ځينې برخې پکې له پامه غورځول شوي.
ټاکنو کمېسیون د ولسمشریزو او د غزني ولایت پارلماني ټاکنو لپاره د وري میاشتې ۳۱مه نېټه ټاکلې چې څو ورځې وړاندې یې زماني مهالویش په مشروط ډول تصویب شو.
ټاکنو کمېسیون چې تر اوسه د پآرلماني ټاکنیزې پروسې له مدیریت ندی وتلی، د ولسمشریزو ټاکنو پروسه هم ورله غاړې ده، خو د حمل ۳۱ نېټې لپاره کمېسیون ته د بودیجې او امنیت وضاحت ندی ورکړل شوی.
د کمېسیون لخوا د ولسمشریزو ټاکنو لپآره اوسنی جوړ شوی مهالویش هم په مشروط ډول تصویب شوی چې ځینې جزیات پکې کم دي.
په ټاکنو د څار بنسټونه مهالویش له تخنیکي نیمګړتیا ډک بولي او باور لري چې د تطبیق لپاره یې منظم پلان نشته.
اوس چې له ولسمشریزو ټاکنو سره یو ځای د غزني پارلماني ټاکنې هم کېږي، کمېسیون ته یې د ډول په تړاو حکومت وروستۍ پرېکړه نده ورکړې چې هلته ټاکنې په کوم ډول کېږي.
ټاکنو کمېسیون د کارونو د دروند حجم له امله د ولایتي او ولسوالیو شوراګانو ټاکنې په زماني مهالویش کې د سنبلې ۳۰ ته وړي، خو په ټاکنو د څار بنسټونه باور لري چې کمېسیون به ولسمشرېزې او د غزني پارلماني ټاکنې هم په ټاکلې نېټه ترسره نشي کړای.
