اسلامي ا مارت د واشنګټن پوسټ ورځپاڼې هغه ادعاوې ردوي چې د تېر نظام له سقوط وروسته افغانستان کې پاتې امریکايي وسلې په خیبرپښتونخوا، بلوچستان او پاکستان کې د وسلوالو ډلو لاس ته ورغلې دي.
دغې ورځپاڼې د پاکستاني چارواکو په حواله ويلي، په خیبرپښتونخوا او بلوچستان کې له وسلوالو سره د جګړې پرمهال د پاکستاني ځواکونو له لوري نیول شوې وسلې، د هغو وسلو برخه دي چې امریکا په افغانستان کې پخوانيو ځواکونو ته ورکړې وې.
خو د اسلامي امارت مرستیال ویاند حمد الله فطرت بیا وايي، د مخکېني نظام له سقوط او د امریکا له وتلو وروسته په افغانستان کې پاتې شوې وسلې خوندي دي او د افغانستان د دفاع لپاره به ترې کار اخیستل کېږي.
فطرت په خیبرپښتونخوا، بلوچستان او پاکستان کې له وسله والو سره د امریکايي وسلو شواهدو ته په اشارې وايي، دا وسلې د هغو امریکايي وسلو برخه ده چې د کراچۍ بندر له لارې به په افغانستان کې دېره بهرنيو ځواکونو ته د انتقال پر مهال په لاره کې غلا کېدې او اوس په پاکستان کې د وسلو تور بازار له لارې آزادانه پلورل کېږي.
فطرت په دې ا ړه وايي: « هغه امریکايي وسلې چې د ۲۰ کاله جګړې پر مهال افغانستان ته راغلې دي، هغه له ډېرې پخوا راهیسې په تور بازار کې موجودې وې او دا هېڅکله دا مانا نه لري، که له چا سره امریکايي وسلې وي، دا به له افغانستانه ور رسېدلې وي. کله چې د پاکستان د کراچۍ بندر او نورو لارو د اشغالګرو ځواکونو اکمالات کېدل او لوجسټیکي کاروانونه یې له پاکستان تېرېدل، دا په ځلونو پېښه شوې چې کانټینرونه مات شوي، وسلې او تجهزات ترې د پاکستان تور بازار ته رسېدلي.»
په ورته مهال د پوځي چارو شنونکي د پاکستان په ناامنيو کې د افغانستان لاس لرلو ادعاوو ته په غبرګون کې وايي، له څو لسیزو راهیسې پاکستاني چارواکو تل د خپلو سیاسي موخو لپاره د افغانستان هر اړخيز وضعيت ننګولی.
د پوځي چارو شنونکی توریالی ځاځی وايي: « کومې خبرې چې موږ یې د پاکستان په اړه کوو، دا هسې د اوسپنو ټکول دي. پاکستان په افغانستان کې سیاسي اهداف لري. د دې لپاره چې د پاکستاني چارواکو خوله وربنده شي، باید قاطع ځواب ورکړل شي. د شهباز شریف کورنۍ د افغانستان په بربادۍ، ورانولو او د خلکو په وژلو کې لاس لري.»
ځينې نور بیا وايي، پاکستان له اوږدې مودې راهيسې تر خپل کنټرول لاندې سيمو کې د ناقانونه وسلو د پېر او پلور زمينه برابره کړې او په خبره يې په دې توګه يې هغو ډلو ته د تسليحاتي تمويل فرصت برابر کړی چې د افغانستان په شمول په نورو هېوادونو کې ترې د ناامنيو لپاره استفاده کوي.
د سیاسي چارو شنونکی عزیز معارج وايي: « پاکستان خپله د غیرقانوني وسلو د خرید او فروش ځای دی. له نن ۵۰ کاله مخکې هم پخوانیو مجاهدینو وسله په پاکستان کې اخیسته. په تېرو ۲۰ کالو کې چې کومې وسلې د پاکستان له لارې افغانستان ته راتلې، په لارو کې د پاکستانیانو له خوا غلا کېدې او بیا په وسله والو ډلو پلورل کېدې. خپله طالبانو هم د پیسو په بدل کې له دغو وسله ګټه اخیستې. په وزیرستان کې د لرې واټن ویشتونکو توغندیو په ګډون هر ډول سپکې او درنې وسلې په آزاد ډول پلورل کېږي.»
په دې وروستیو کې د پاکستان لومړي وزیر په ګډون د دې هېواد یو شمېر لوړ پوړو چارواکو په کراتو ادعا کړې چې په افغانستان کې پاتې شوې امریکايي وسلې په پاکستان کې د وسله والو ډلو لاس ته له لوېدو وروسته، د دې هېواد امنيتي ثبات له جدي ګواښونو سره مخ دی.
خو اسلامي امارت هرځل د پاکستان دغه ادعاوې رد کړې دي او له امریکا پاتې شوې وسلې یې ټولې د حکومت په واک کې خوندي بللې دي.
