د هېواد په ختیځ او شمال ختیځ کې مرګونې زلزلې چې د شدت کچه يې د ريښتر ۶.۴ درجې ښودل شوې، یو شمېر ولایتونه یې سخت لړزولي او پراخ ځاني او مالي زیانونه يې اړولي دي.
د اسلامي امارت ویاند د پېښې د لومړنیو جزئیاتو وړاندې کولو په تړاو خبري کنفرانس کې د زورورې زلزلې د مرګ ژوبلې شمېر شاوخوا ۴ زره کسان اعلان کړ او وې ویل چې ډېری سیمو ته لا د ژغورنې ټيمونه نه دي رسېدلي او ښايي مرګ ژوبله له دې هم لوړه شي.
د ذبیحالله مجاهد په خبره، د دې پېښې ډېری قربانیان په کونړ کې دي. د لومړنيو شمېرو له مخې د دې ولایت په نورګېل، څوکۍ، ماڼوګي، چپې درې او وټه پور ولسوالیو کې له ۸۰۰ ډېر کسان شهیدان او ۲۵۰۰ ډېر ټپیان شوي دي.
د اسلامي امارت ویاند ذبیحالله مجاهد په دې اړه وايي: « په کونړ کې په عمومي ډول تر اوسه پورې د ۸۰۰ تنو شهیدانو راپور لرو(انا لله و انا الیه راجعون). همدارنګه ۲۵۰۰ تنه ژوبل شوي. د پېښې محل نورګېل، څوکۍ، وټه پور، ماڼوګي او چپه دره ولسوالۍ او ځینې نورې سیمې دي. د نورګېل ولسوالۍ مزاردره کلي ته د ژغورنې ټیمونه رسېدلي، خو تر اوسه یې د مرګ ژوبلې جزئیات نه دي رسېدلي، چې ښايي د مرګ ژوبله کچه لوړه کړي.»
مجاهد دغه راز وايي، یادې زلزلې د کونړ ترڅنګ په ننګرهار، لغمان، نورستان او پنجشېر ولایتونو کې هم له یو شمېر کسانو ژوند اخیستی، ژوبل کړي او کورونه یې ویجاړ کړي دي.
د نوموړي په خبره، زلزله ځپلو سیمو ته د رسېدنې او د ټپیان او شهیدان د انتقال په موخه ګڼې الوتنې شوې او ګڼ روغتیايي او مرستندویه ډلې زيانمنو شویو سیمو ته استول شوي دي.
په دې اړه د غمشریکۍ پیغام کې حکومت ګڼو وزارتونو او دولتي ادارو ته امر کړی چې زيانمنو شویو سيمو ته د رسېدو او د اړینو مرستو رسولو چارې ترسره کړي.
د اسلامي امارت ریاست الوزرا د بېړنيو اقداماتو لپاره ۱۰۰ میلیونه افغانۍ ځانګړې کړې دي.
د اسلامي امارت ویاند په دې اړه وايي: « د عاجلې رسېدنې لپاره د ریاست الوزرا له خوا زر لکه(۱۰۰ میلیونه) افغانۍ ځانګړې شوې، ترڅو په مختلفو برخو کې ټیمونه وګوماري او د اړمنو کسانو روغتیايي، خوراکي، لباسي او هر ډول اړتیاوې پوره کړي. همدارنګه لارښونه شوې چې هرڅومره پیسو ته اړتیا وي، د ریاست الوزا مقام یې ورکولو ته چمتو دی.»
د اسلامي امارت ویاند دغه راز زیاتوي، له زلزله ځپلو سره د مرستو د جلب او شفافې ویشنې په موخه ځانګړې حکومتي کمېټه جوړه شوې، سوداګر، پانګوال او عام هېواد کولی شي له همدې لارې خپلې مرستې وکړي.
د اسلامي امارت ویاند وايي: « له ټولو خیریه بنسټونو، تجارانو او عامو افغانانو څخه غوښتنه کوو چې له خپلو زلزله ځپلو خلکو سره مرستې ته را ودانګي او په دې سختو شرایطو کې د خپلو متضررو هېوادوالو لاسنیوی وکړي. د مرستو د ښه تنظیم لپاره لارښونه کېږي چې هر ډول مرستې باید د ټاکل شوې کمېټې له خوا تنظیم شي، ترڅو شفافیت رامنځته او تر مستحقو کسانو ورسول شي.»
د امریکا ځمک پېژندنې سروې د مالوماتو له مخې، دغه زلزله چې مرکز یې د کونړ سیمه یاده شوې، اصلي مرکز یې تر ځمکې لاندې ۸ کیلومترۍ کې و او د افغانستان په ګډون یې د پاکستان، هند او د یو شمېر نورو هېوادونو ځینې سیمې هم لړزولې دي.
