اجیت دووال،چې د دې ناستې مشري یې کوله وویل، اوس وخت رارسېدلی دی،چې د سیمې هېوادونه سلا مشورې وکړي او د افغانستان ستونزې لپاره د حل لار پیدا کړي.
دووال زیاتوي:«په افغانستان کې اوسنی وضعیت یوازې افغانانو ته نه، بلکې د ګاونډیو او سیمې پر هېوادونو هم اغېز لري او باید مخه یې ونیول شي.»
روسیې بیا د هند ناسته د افغانستان لپاره مهمه یاده کړه،چې کولای شي، د شته ستونزو لپاره لار پیدا کړي او د ګواښونو د مخنیوي لپاره زمینه برابره کړي.
د روسیې د امنیت شورا سلاکار نیوکولای پتروشیف وايي:« د افغانستان په تړاو د بېلابېلو هېوادونو د امنیت شورا سلاکارانو ناسته اغېزمنه تمامیږي،ځکه ګډونوال یې د روانو ستونزو پر بېلابېلو اړخونو او عواملو غږیږي او کولای شي، د افغانستان ستونزې لپاره پر لوړه کچه یوه حل لاره پیدا کړي. همدا راز کولای شي،هر ډول ننګونو او د ګواښونو مخنیوي لپاره زمینه برابره کړي.»
د تاجکستان د امنیت شورا سلاکار نصرالله محمد زاده بیا اندیښنه وښوده،چې د افغانستان له لوري ورته د ترهګرۍ ګواښونه د زیاتیدو په حال کې دي .
نصرالله زیاته کړه:« افغانستان او تاجکستان پر ګډه پوله ترینګلتیاوې ورځ تر بلې د زیاتېدو په حال کې دي،ځکه د افغانستان له لوري زموږ لور ته د ترهګرۍ ګواښونه ورځ تر بلې د زیاتیدو په حال کې دي.»
اسلامي امارت ویاند ذبیح الله مجاهد بیا دغه ناسته د افغانستان لپاره ګټوره او مهمه بللې او ټېنګار یې کړی دی،چې ټولو ګاونډیانو او سیمې ته ډاډ ورکوو،چې د افغانستان له خاورې نه به ورته ګواښ نه پېښېږي.
مجاهد زیاتوي:« د هندوستان ناسته د افغانستان په ګټه ده،ځکه چې توله سیمه د افغانستان ثبات مهم ګڼي او دا کار ټولو ته یو ارزښت دی،هم د امنیتي پلوه او هم له اقتصادي لحاظه.»
ټاکل شوې ده، چې د پنجشنبې په ورځ په اسلام اباد کې د تورویکا پروسې ناسته ترسره شي او د امریکا، چین،روسیه او پاکستان استازي به په کې د افغانستان په تړاو بحث او خبرې ولري او د دغې ناستې په څنډه کې به د افغانستان د بهرنیو چارو سرپرست وزیر د یادو هېوادونو له استازو سره لیدنې ولري.
