د پوځي چارو شنونکی توریالی ځاځی وايي:« د سیمې ناسته تر اوسه کومه پایله نه ده ورکړې او راتلونکې کې به یې هم ورنه کړي. پوښتنه باید له نړیوالې ټولنې وشي،چې له ټول شموله حکومت څخه د دوی تعریف څه دی. دوی که په رېښتیا د بشر حقونو مدافعین وي،نو باید هغه څیرې نړیوالې محکمې ته راکاږي،چې جنګې جرایم یې کړي او بیا دې له طالبانو د ټول شموله حکومت غوښتنه وکړي.»
بل خوا ځینې نور بیا په دې باور دي،چې دا ډول ناستو کې د اسلامي امارت استازو ته هم بلنه ورکړل شي،مثبتې پایلې به ولري،خو پر وینا یې د افغانستان د قضیې اصلي لوری امریکا ده،چې باید خبرې ورسره وشي.
د پوځي چارو شنونکی احمد خان اندړ وايي:« د ناورې ناسته ښه وه او که دا ناستې ادامه پیدا کړي او طالبان هم په کې ګډون وکړي،نو د دوی د رسمیت پیژندنې سره مرسته کولی شي،خو اصلي خبرې باید له امریکا سره وشي،ځکه زموږ پیسې یې کنګل کړي دي. طالبان هم باید په خپلو کړنو کې انعطاف وښیي،تر څو نړۍ ورسره تعامل وکړي.»
د افغانستان له بشري او سیاسي وضیعت سربېره په یاده ناسته کې د یوې بلې کاري کمیتې پر تشکیل هم هوکړه وشوه،چې مسوولیت به یې د ایران چابهار بندر لا پیاوړي او کارنده کول وي.
هند له دې کار سره غواړي،د افغانستان په ګډون د مرکزي آسیا له پنځو هېوادونو سره خپلې سوداګریزي اړیکې پراخې کړي،ځکه یاد هېوادونه له هند سره یوازې ځمکنۍ نښلیدونکې لارې لري.
