د اسلامي امارت له واکمنېدو راهیسې د هلمند اداري تشکیلاتو کې نهر سراج ولسوالۍ ته ارتقا وکړه چې اوسېدونکي یې په یو شمېر سیمو کې د عامه خدمتونو، ښوونیزو او روغتیايي مرکزونو او نورو بنسټیزو اسانتیاوو د زیاتېدو غوښتنه کوي.
دوی وايي، شته خدمات د خلکو اړتیاوې نه شي پوره کولی او حکومت باید د دوی ستونزو ته جدي پاملرنه وکړي.
د نهرسراج اوسېدونکی عبدالله وايي: « زموږ سیمه کې هېڅ ښوونځی او روغتیايي مرکز نه شته. موږ خپل ناروغان لښګرګاه ته وړو او ډېره کله په لارو ساه ورکوي. زموږ ماشومان له لوبو پرته بل کار نه لري.»
د نهرسراج اوسېدونکی عبدالرحمن وايي: « باید دلته مکتبونه او کلینیکونه جوړ شي، ترڅو زموږ ماشومان لوست وکړي او ناروغان مو له روغتیايي خدمتونو برخمن شي.»
د دې ولسوالۍ اوسېدونکي پر دغو عامه خدماتو سربېره، د پاکو اوبو له نشتوالي سره هم مخ دي.
د سیمې خلکو په خبره، د پاکو اوبو د نه شتوالي له امله ګڼ شمېر کسان په بېلابېلو ناروغیو اخته کېږي.
د نهرسراج اوسېدونکی اسلام الدین وايي: « زموږ سیمه له ښاره وتلی ځای دی، دلته هېڅ نه شته او موسسات هم نه راځي. موږ خپلو ماشومانو ته ښوونځی او دغه راز پاکې اوبه غواړو.»
د نهرسراج قومي مشر سیدالرحمن وايي: « دلته اوبه دومره تروې دي چې نه یې انسان څښلی شي، نه حیوان او نه هم بوټي وده کوي. زموږ خلک ټول د ګېډې په ناورغیو اخته دي.»
له بلې خوا، سیمهییز مسوولین وايي، په دې ولسوالۍ کې یې د یوه لوی روغتیايي مرکز د جوړولو چارې بشپړې کړې او د یوه بل روغتیایي مرکز د جوړولو هڅه کوي.
مسوولین د یو شمېر نورو پراختیايي پروژو د پلي کېدو ډاډ هم ورکوي او وايي، کارونه به یې ژر پیل شي.
د هلمند والي ویاند محمد قاسم ریاض وايي: « په نږدې راتلونکي کې د ولسوالۍ په کچه په نهرسراج کې روغتیايي مرکز جوړېږي. دلته د یو شمېر سړکونو د اساسي جوړولو پلانونه هم جوړ شوي او دغه راز به خلکو ته هر هغه عامه خدمات وړاندې شي چې اړتیا یې وي.»
دا په داسې حال کې ده چې د نهرسراج ترڅنګ د هلمند د یو شمېر نورو لرې پرتو ولسوالیو اوسېدونکي هم په خپلو سیمو کې د عامه خدمتونو د پراخېدو او د بنسټیزو اسانتیاوو برابرېدو غوښتنې لري.
