د وروستیو موندنو له مخې اوسمهال د افغانستان په دوه سوو نقطو کې خپلسري کانونه کیندل کیږي.
د هراک په نوم یو څېړنیز ګروپ چې په دې برخه کې یې څېړنه کړې انديښنه ښودلې چې که په کانونو عامو خلکو ته د څار ونډه ور نه کړل شي، د کانونو راتلونکی ګواښوونکی دی.
له دې سره د کانونو وزارت وایي، د کانونو د مسلکي او قانوني کیندلو لپاره تګلاره رامنځ ته شوې چې ځینو سیمو کې یې خپلسرې کیندنې درولي دي.
که څه هم ولسمشر ویلي، چې د افغانستان د کانونو ارزښت تر تریلیون ډالرو زیات دی، اوس په خپلسري ډول کیندل کیږي چې ګټه یې ځایي زور واکي او وسله وال وړي.
د هراک په نوم د څېړنیز بنسټ موندنې ښيي چې اوسمهال ډيری کانونه پرته له قرارداد او مسلکي کسانو کیندل کیږي چې کانونه یې له ګواښ سره مخ کړي دي.
دې بنسټ د کانونو د کیندلو پرمهال د ماشومانو په وضعیت هم انديښنه ښودلې چې کان کیندنه کې ترې کار اخیستل کیږي.
اوس ټینګار پر دې دی چې د کانونو له درکه چارواکي او زور واکي زیاتې پيسې ترلاسه کوي او اړتیا ده چې شتمنۍ یې ثبت شي.
د کانونو وزارت بیا دا موندنې بې بنسټه یادوي او باور لري چې اوس تر بل هر وخت د کانونو د کیندلو لپاره منظمه تګلاره رامنځ ته شوې ده.
د کانونو د خپلسرو کیندنو لپاره ځینو سیمو کې مصنوعي ناامني هم جوړه شوې چې دولتي ځواکونه په کانونو له څار لیرې وساتي.
تر دې وړاندې د ولسي جرګې ځینو غړو ویلي وي، له دې درکه د دولت د وسله والو مخالفینو تر څنګ ځایي زور واکو ته زیاتې پيسې په لاس ورځي او د دې ګټې د دوامداره ترلاسه کولو لپاره د دولت ضد هر کار یې چې په توان پوره وي، کوي یې.
