د افغانستان او ایران سوداګرۍ ګډې خونې له خوا د هرات ګلران ولسوالۍ د بوتان کلي زلزله ځپلو لپاره ۴۶ کورونه جوړ او ګټې اخیستنې ته وسپارل شول.
مسوولین وايي، د دې هر کور په جوړولو ۸ زره ډالر لګښت راغلی چې د سړو، تودوخې او زلزلې پر وړاندې مقاومت لري.
د افغانستان او ایران د ګډې سوداګریزې خونې رییس محمود سیادت وايي: « زه هېله لرم دې ته په کتو سره چې دواړه هېوادونه د زلزلو، سېلابونو او طبیعي پېښو له خطر سره مخامخ دي، لپاره یې داسې جوړښت رامنځته کړو، که د دواړو ملتونو خلک زیانمن کېږي، ورسره مرسته وکړای شو.»
د کورونو جوړولو پروژې مسوول سعد خطیبي وايي:« کوم کورونه چې دلته جوړ شوي، له هغو ټولو کورونو سره توپير لري چې په نورو ځایونو کې زلزله ځپلو ته جوړ شوي دي. دا کورونه د زلزلې پر وړاندې مقاومت لري او د هر کور مساحت شاوخوا ۷۰ متره مربع دی چې نږدې ۸ زره ډالر لګښت پرې راغلی. دا کورونه د سړو او تودوخې پر وړاندې عایق دي او د زلزلې پر وړاندې مقاومت لري.»
په همدې حال کې، افغانستان مېشت ایراني ډېپلوماټان د دواړو هېوادونو ترمنځ ورته همکاري د اړیکو د پياوړتیا او پراختیا لپاره مهمه بولي.
هرات کې د ایران کونسل عليرضا مرحمتي وايي: « کله چې د ایران خلک وویني چې افغانان د دوی مرستې ته اړتیا لري، دریغ به ونه کړي، ځکه زموږ خلک د دې ځای خلک خپل او یو ملت ګڼي.»
له بلې خوا، ځايي چارواکي له ګاونډیو هېوادونو د متقابلو همکاریو پر دوام او اړیکو ټینګار کوي.
د هرات والي نور احمد اسلام جار وايي: « موږ د خپل ځان، خپلې خاورې او هېواد لپاره امنیت، آرامي، سوله او ترقي غواړو. دغه راز د خپلو ګاونډیانو لپاره هم سوله او ترقي غواړو. اسلامي امارت د ژوندانه د هرې برخې او ټکي لپاره پلانونه لري او که خدای کول پلي کېږي به.»
شاوخوا دوه کاله وړاندې د هرات په رباط سنګي، زنده جان او ګلران ولسوالیو کې پرله پسې زلزلو درنه مرګ ژوبله واړوله او د دغو ولسوالیو ګڼ شمېر کلي یې په کنډوالو بدل کړل.
له دولتي ادارو سربېره، ګڼو ملي او نړیوالو موسسو، سوداګرو او مرستندویه بنسټونو زلزله ځپلو ته د کورونو جوړول پيل کړل او تر اوسه یې ډېره برخه بشپړ او کورنیو ته سپارل شوي دي.
