د هرات ولایت کار او ټولنیزو چارو ریاست مسوولین وایي، سلګونه وزګارو ځوانانو ته یې په شپږو میاشتو کې د خیاطۍ، موبایل او موټرسایکل ترمیمولو، د کور وسایلو ترمیمولو او د برېښنا مزو غځولو برخو کې زده کړې ورکړې او د روزنیزې له دورې وروسته به د کار لپاره اړین امکانات او وسایل هم ورته برابر کړي.
د هرات د کار او ټولنیزو چارو رییس میرزامحمد ابومنصور وايي: « دا ټول امکانات د اسلامي امارت له خوا چمتو شوي، د دوی د کار وسایل، خام مواد او هغه کېټونه ټول د اسلامي امارت له خوا چمتو شوي چې د کار په پای کې به دوی ته ورکول کېږي.»
په ورته مهال، ځوانان هم خوښ دي چې په کور دننه ورته د حرفوي زده کړو زمینه برابره شوې او له دې لاري به وکولی شي خپلو کورنیو سره د اقتصادي ستونزو په هوارولو کې ونډه واخلي.
د مسلکي زده کړو زده کوونکی صدیق الله وايي: «له اسلامي امارت غواړو چې نورو ځوانانو ته هم داسې د کار زمینه برابر کړي ترڅو بهرنیو هېوادونو ته لاړ نه شي او په کور دننه کار وکړي.»
یو بل زده کوونکی سمیع الله وايي: « ستونزې مو ډېرې وې او د کور لګښتونه نه پوره کېدل، له اسلامي امارت مننه کوو چې موږ ته یې دا زمینه برابره کړه. اوس کولی شم د کور په لګښتونو پوره کولو کې برخه واخلم.»
د مسلکي زده کړو ګډونوال ځوانان وايي، که د دې ډول حرفوي زده کړو زمینه ورته پراخه شي، کولی شي خپلې زده کړې نورو ځوانانو ته هم ولېږدوي.
زده کوونکی عزت الله وايي: « موږ اوس کولی شو نورو ځوانانو ته هم روزنه ورکړو ترڅو خپلې اقتصادي ستونزې هوارې کړي. دا زده کړې ډېرې ګټورې دي او مرسته کوي چې ځوانان د کار خاوندان شي او له خپلو کورنیو سره مرسته وکړي.»
زده کوونکی میلاد هم وايي: « بېکاري سبب شوې وه چې زه له ځانه ناهیلۍ شم او په دې فکر وکړم چې ولې زما عمر لرونکي ځوانان کار لري خو زه یې نه لرم. له ریاست څخه مننه چې موږ یې دلته مصروف کړو.»
بله خوا، کارپوهان هم اوسنيو شرایطو کې په کور دننه د ځوانانو لپاره د کارموندنې په موخه د حرفوي زده کړو فرصتونو پر لا زیاتېدو ټینګار کوي او وايي، دا زده کړې به په کور دننه د ځوانانو اقتصادي ستونزې حل او بهرنیو هېوادونو ته د هغوی د کډه کېدو مخه ونیسي.
د ټولنیزو چارو کارپوه احمد حسین محمدي وايي: « په حقیقت کې دا زده کړې د ځوانانو د کاري راتلونکې تضمین دی؛ نن یو کسب زده کوي ترڅو سبا کاري بازار ته ننوځي او په ټولنه کې د یوه ګټور کس په توګه خپل مسوولیت اداء کړي. دوی به خپل کسب او زده کړې راتلونکي نسل ته ولېږدوي او په ټولنه کې د ګټورو کسانو په توګه ونډه ولري.»
د کار او ټولنیزو چارو ریاست د مسوولینو له مالوماتو سره سم، په پام کې ده په روان کال کې ۱۵۰۰ ځوانانو ته د حرفوي زده کړو زمینه برابره شي.
