د هرات امنیه قوماندانۍ مسوولینو د تېر ۱۴۰۲ لمریز کال شپږو وروستیو میاشتو کې د ۱۱۲۸ کسانو نیولو خبر ورکوي.
د مسوولینو په خبره دغه کسان د وسلوالو غلاوو، قتل، نشهيي توکو پېر او پلور، جعلي اسنادو، رشوت او نورو جرمونو په تور نیول شوي چې ۳۵۰ میله بېلابېل ډول وسلې، ۲۴۷۹ کیلو ګرامه بېلابېل ډول نشهيي توکي او ۹۳۸ لیټره الکولي مشروبات ورڅخه لاسته راغلي.
د هرات امنیه قوماندانۍ ویاند عبدالله انصاف وايي: « د هرات د امنیه قوماندانۍ امنیتي ځواکونو د تېر ۱۴۰۲کال په وروستیو شپږو میاشتو کې د بېلابېلو جرمونو په تړاو ۱۱۲۸ کسان نیولي دي.»
انصاف همداراز ډاډ ورکوي چې د پخوا په پرتله امنیتي وضعیت کې د پام وړ مثبت بدلون راغلی او امنیتي ځواکونه په جدیت سره د اخلالګرو پر وړاندې مبارزه کوي.
هغه زیاتوي: « الحمدالله امنیتي او کشفي ځواکونو تل هڅه کړې چې د دغو مجرمینو مخه ونیسي، د جرمونو کچه د تېر پرتله ډېره راټيټه شوې او په ټیټه کچه کوم جرمونه چې ترسره کېږي، د دې مخه به هم ونیول شي. زموږ امنیتي ځواکونو د هر ډول جرم پر وړاندې ښه مبارزه کړې ده.»
بل خوا د هرات اوسېدونکي هم په دغه ولایت کې د امنیت له ټینګښت د خوښۍ ترڅنګ له امنیتي مسوولینوغواړي چې د خلکو امنیت د ټینګښت لپاره خپلې هڅې لا چټکې کړي.
د هرات یو تن اوسېدونکی وايي: « شکر الحمدالله اوس امنیتي وضعیت ډېر ښه دی، هر څوک کولی شي شپه او ورځ ښه په ارامه فکر خپل کار او روزګار وکړي.»
د هرات یو بل اوسېدونکی بیا وايي: « خلک باید له امنیتي ځواکونو سره همکاري وکړي، څو نظم لا ښه او بهتر شي او امنیتي ځواکونه دې له ځانګړي یونیفورم څخه ګټه واخلي څو وپېژندل شي.»
دا په داسي حال کې ده، چې واک ته د اسلامي امارت له رسېدو سره هرات کې د انسان تښتونې پېښې هم صفر ته رسېدلي دي.
