د نیمروز په ولایت مقام کې د یکشبنې پر ورځ د ( ۱۴۰۲ کال د مرغومې پر ۲۴ مه) ځانمرګی برید وشو.
د یاد ولایت امنيې قومانداني دا نه تائيدوي، چې ګواکې ځانمرګی بريد دې د ولايت په مقام کې دننه شوی وي، خو د نيمروز والي محمد قاسم خالد وايي، ياد ځانمرګی بريدګر له وړاندې د ولايت په مقام کې ځای پر ځای شوی وه.
خالد وايي، وړاندې له دې چې ځانمرګی بريدګر خپل ټاکلي هدف ته ورسېږي، د ولايت مقام ساتونکو له لوري پېژندل شوی او د له منځه وړلو پرمهال يې پر ځان پورې تړلو چاودېدونکو توکو ته هم چاودنه کړه ده.
خالد په دې پېښه کې يوازې د درېيو کسانو د ټپي کېدو راپورونه تائيدوي.
هغه زیاتوي:« د دوښمنانو پلان له مخې، یو بریدګر دلته راغلی وه او ځای پر ځای شوی وه، مخکې له دې چې برید ځان ته چاودنه ورکړي له موږ سره چې کوم قهرمان مجاهدین ول، د هغوی په ډزو کې بریدګر ووژل شو. کوم چاودېدونکي توکي چې بریدګر سره ول، هغو ته هم چاودنه ورکړل شوه. زه الحمد الله بیخي روغ او جوړ یم. هېڅ ستونزه نه شته.»
واک ته د سرپرست حکومت له رسېدو سره، تېر کال د بلخ ولايت په مقام کې له چاودنې وروسته دا دويمه چاودنه ده، چې د ولايت په مقام کې ترسره کېږي.
د پوځي چارو کارپوهان د نيمروز ولايت مقام کې چاودنې ته په کتو دا ډول بريدونه حساس بولي او وايي، څو لسيزو جګړو بهرنيو استخباراتو ته په افغانستان کې د ورته بريدونو د ترسراوي زمينه برابره کړې.
د پوځي چارو کارپوه خلیل نادم وايي: « په دې هېواد کې شاوخوا ۴۵ کاله کېږي چې جنګونه روان دي. دلته په دغو ۴۵ کلونو کې دومره اجنټان د هېوادونو لخوا روزل شوي چې هره ګړۍ یې وغواړي د افغانستان پر ضد یې کاروي. دغه چاودنې چې په افغانستان کې کېږي دا سیمې او نړیوالو هېوادونو استخباراتو کار دی. دوی غواړي چې د افغانستان امنیت ګډوډ کړي.»
ځینې نور بیا ټېنګار کوي چې سرپرست دې د ورته بريدونو د مخنيوي لپاره له خپل ظرفيت استفاده وکړي؛ ځکه د دوی په خبره، ورته بريدونه کولی شي چې د امنيتي وضعيت د اخلال ترڅنګ سرپرست حکومت ته خاص پيغام ورکړي.
له دې وړاندې د حکومت لوړپوړو چارواکو ويلي، هېچا ته به د امنيتي وضعيت د اخلال اجازه ورنه کړي او ان ګواښ يې کړی، که کوم څوک د اوسني حکومت په مقابل کې واقع شي، له سخت برخليک سره به مخ شي.
