کونړ کې د ویجاړو شویو کورونو چپه شویو دېوالانو د راناستو چتونو لاندې د بند پاتې خلکو د ایستلو هڅې روانې دي. د سیمې خلک او مرستندویه ادارو کارکوونکي په ګډه هڅه کوي چې تر خاورو لاندې د شهیدانو اجساد را وباسي.
د نیستۍ څپو وهلی او په تن ضعیف سپین ږیری د خپل ویجاړ شوي کور په ډاګ ناست دی او وايي، کور یې په زلزله کې په بشپړ ډول ویجاړ شوی، د مېرمنې او د دوو بچیانو جسدونه یې د خپل کور د رانړېدلو دېوالونو لاندې دي.
د قرباني شوې کورنۍ سرپرست وايي: « زه خپله کور کې نه وم، ښځه او دوه بچیان مې کور کې وو چې زلزله راغله او درې واړه تر خاورو لاندې شول. پرون ورځ مو کار وکړ، خو بچي مې پیدا نه شول، نن بیا هم لګیا یو چې د بچیو جسدونه را وباسو.»
دغه سپین ږیری چې زلزلې یې د کورنۍ غړي او د کور ټوله هستي اونیستې ترې اخیستې، د مرستې غوښتنه کوي او زیاتوي چې له همدې یوه جوړه زړو جامو پرته چې اوس یې په تن دي، بل هېڅ هم نه دي ورپاتې.
د قرباني شوې کورنۍ سرپرست وايي: « د حکومت چې څه له وسې کېږي، ما سره یې د وکړي؛ ځکه هرڅه، دار او ندار مې لاندې شول او زه اوس هر څه ته اړتیا لرم. تر هرڅه وړاندې سرپناه او خوراکي توکو ته اړتیا لرم.»
زلزلې د نورګل ولسوالۍ مزار درې په ودیر کلي کې د هرکور له غړیو قرباني اخیستې چې د سیمې او اسېدونکي په وینا، لاهم په ځینو ساحو کې شهیدان تر خاورو لاندې دي.
د ودیر کلي د جومات امام مولوي رحمت الله وايي: « زما له کور څخه ۷ تنه شهیدان شوي. شاوخوا کې د مړو او ژوبلو کسانو شمېر ناڅرګند دی، هر کور کې دغه حال دی.»
د قرباني شوې کورنۍ سرپرست وايي: « زموږ کور رانسکور شوی، ټول غړي ترې لاندې دي، لګیا یو را وباسو یې، د شمېر پته نه لګي.»
دغه زلزله ځپلې کورنۍ وايي، حکومت یې ټپیان د چورلکو په وسیله تر روغتونونو رسولي او د شهیدانو په انتقال کې یې هم ورسره مرسته کړې، خو لاهم لومړنیو مرستو ته اړتیا ده او باید د سرپنا غمه وخوړل شي.
د قرباني شوې کورنۍ سرپرست وايي: « د نورګل ولسوالۍ تقریبا ً ټول کلي زلزلې وهلي او خراب کړي دي. موږ عاجلو مرستو ته اړتیا لرو.»
د یوې بلې کورنۍ سرپرست وايي: «دلته اوس د خېمو اړتیا ده، ځکه نن شپه باران راغی او زموږ خلک تر شنه آسمان لاندې په لوڅه ځمکه پاتې وو. زموږ خلک هر ډول مرستې ته اړتیا لري.»
د کونړ په نورګل، چپه دره، پېچ دره، وټه پور او اسعد اباد ولسوالیو کې زلزلې له پنځه زره زیات کورونه ویجاړ کړي او زرګونه خلکو ته یې مرګ ژوبله اړولې. وضیعت په کتو، ممکن د قربانیانو شمیر نور هم لوړ شي.
