ډېر ژر به د ننګرهار هوایي ډګر د احاطې دیوالونو او امنیتي برجونو د جوړولو چارې پیل شي.
د ننګرهار رسنیو مرکز څخه په خپره شوې خبرپاڼه کې راغلي چې په همدې تړاو نن د ملکي هوایي چلند ادارې او جوړونکي شرکت ترمنځ هوکړه لیک هم لاسلیک شوی.
پر دغه پروژې ۷۹ اعشاره ۹ میلیونه افغان لګښت راځي چې افغان حکومت یي ورکوي.
د ملکي هوایي چلند ادارې مشر ډاکټر محمد قاسم وفايي زاده ویلي چې د ننگرهار هوایی ډګر په کابل کې د بیړني حالت او خراب هوا شرایطو او همدا راز د هېواد ختیځو ولایتونو سره د ارتباط لپاره د حامد کرزي نړیوال هوایي ډګر د بدیل په توګه مهم دی.
تمه ده چې د دې پروژې بشپړېدل به د ختیځو ولایتونو د کرنیزو محصولاتو صادرات سیمه ييزو او نړۍ بازارونو ته لاره هواره کړي.
د مسافرینو ترمینل، اور وژنې او هوا پیژندنې ودانۍ، ځغاستلیک او نورو برخو چارې به هم ډېر ژر دواوطلبۍ ته وړاندې شي.
ټاکل شوې په راتلونکو ورځو کې د ننګرهار د هوایي ډګر رغونه د کوز کونړ اړوند ګمبيري سيمه کې عملاً پیل شي.
