د ننګرهار مومنددرې ولسوالۍ کې ناپېژانده وسله والو یو قومي مشر وژلی 

په ننګرهار ولایت کې یوې ځایي باوري سرچینې د نوم نه ښودلو په شرط ویلي،نا پېژانده وسله والو پرون شپه  د مومندرې ولسوالۍ  اړوند  د ملک جمیل په نوم یو قومي مشر له خپل کور اېستلی او نن سهار یې مړی موندل شوی.

سرچینې ویلي،سیمه ییزو خلکو د دغه قومي مشر د وژلو په غبرګون کې لاریون کړی او د تورخم – جلال آباد لویه لار یې تړلې ده.

د یاد قومي مشر جسد د سیمې اوسیدونکو د اعتراض په ډول د مومندرې ولسوالۍ مخې ته راوړی دی.

تر اوسه د یادې پېښې مسوولیت چا نه دی منلی او نه هم ځايي مسوولینو د یادې پېښې په  تړاو څه ویلي دي.

په دې وروستیو کې ننګرهار کې د قومي مخورو، دیني عالمانو او د ټولنې د نورو اغېزمنو څېرو د وژنو لړۍ توده شوې، چې خلکو ته یې اندېښنې پیدا کړي دي.