د کابل ـ جلال اباد حقلوي سړک چې د ننګرهار له سره رود ولسوالۍ پیل له خوږیاڼو، شېرزاد او حصارک ولسواليو تېرېږي او بیا کابل ولایت سره نښلول کېږي.
دغه سړک له اوږدې مودې راهیسې خراب او خلک یې له ګڼو ستونزو سره مخ کړي.
ځايي اوسېدونکي وايي، له تېرو دوو لسیزو راهیسې د یاد سړک د جوړېدو ژمنې ورسره کېږي، خو تر اوسه پورې یې کارونه نه دي پيل شوي.
د ننګرهار یو تن اوسېدونکی وايي: « د حامد کرزي وخت کې هم ژمنې شوې وې، د اشرف غني وخت کې هم شوې وې او اوس دا دی اسلامي امارت هم راغلی چې دوی هم له اختر مخکې ژمنه کړې وه او دا تراوسه هېڅ هم نه دي شوې.»
د ننګرهار ولایت د ټولګټو چارو ریاست بیا د خلکو ستونزې مني او وايي، د مخکېني حکومت پرمهال نړيوال بانک او د اسیا پراختيايي بانک د یاد سړک د جوړېدو لپاره بودیجه ځانګړې کړې وه او له جلال باد څخه تر ممیلې باغ پورې په اساسي ډول رغول شوی هم دی.
د یاد ریاست مشر مولوي محمد محمدي وايي، له اسیا پراختيايي بانګ سره په اړیکه کې دي او په خبره يې که پايله يې ورنه کړه، نو په ملي بوديجه کې به ورته پيسې ځانګړې کړي.
محمدي زیاتوي: « دا سړک داسې نه چې د حصارک، شیرزاد او د خوږیاڼو یا همدغسې د لوګر د ازرې ولسوالۍ تګ پرې کېږي، دا سړک یوازې همدې خلکو لپاره ګټور نه دی، بلکې د شمالي ولایتونو لپاره هم ډېر ګټور دی؛ نو اسلامي امارت دا پرېکړه کړې چې د دې سړک کار به پیل کوي.»
بل پلو د ننګرهار د والي مرستيال مولوي سعیدالله بنوري ډاډ ورکوي، چې د کابل ـ جلال آباد دویم لاین سړک د جوړولو لومړني کارونه بشپړ شوي او ژمنه کوي، چې په نږدې راتلوونکې کې به یې پاتې کارنه هم پيل شي.
بنوري زیاته کړې:« پر دې سړک به ژر تر ژره کار پیل شي او له یوه شرکت سره مو قرارداد بیخي وروستی شوی دی. یو څه موضوعات پاتې دي؛ نو ان شاءالله چې دغه پاتې ستونزې به هم حل شي، ډېر ژر به کار پيل شي، دا نه یوازې د ننګرهاریانو بلکې د ټولو افغانانو لپاره یو ښه زېری دی او ژر به یې کار پيل شي.»
د کابل ـ جلال آباد لومړی لاین سړک چې ډېر کله د غره ښووېیدنې او ترافیکي پېښو شاهد وي او ګڼو هېوادوالو ته په کې مرګ ژوبله اوړي.
وړمه ورځ هم د کابل ـ جلال آباد لویه لاره د کابل دروازې په درې کېلو مترۍ کې د غره ښوویېدنې له امله د ترافیکو پرمخ تړل شوې، چې د مسافرو او ټرانزیټ پر وړاندې یې ګڼې ستونزې پیدا کړي.
