د ننګرهار اوسېدونکي وايي، له تېرې یوې اوونۍ راهیسې په جلال آباد ښار کې د لومړنیو خوراکي توکو بیې مخ په لوړېدو دي چې له امله یې دوی له ستونزو مخ شوي او نه شي کولی پر لوړه بیه دغه توکي وپېري.
دوی ټینګار کوي چې سرپرست حکومت بايد پر نرخونو پرله پسې څارنه وکړي.
د جلال آباد ښار یوتن اوسېدونکی وايي: « د تېرې اوونۍ په پرتله اوړه، وریجې، غوړي او هرڅه ګران شوي. زه په دا سپینه ږیره کیلې خرڅوم او نه شم کولی حتا یوه میاشت کې د یوې بورۍ اوړو پیسې وګټم. له چارواکو غوښتنه کوم چې راووځي او نرخونه کنټرول کړي.»
همدارنګه د جلاآباد ښار یو تن دوکاندار بیا وايي: « لس پنځه لس ورځې وړاندې نرخونه ښه وو، خو اوس د خوراکي موادو نرخونه لوړ شوي دي.»
یو شمیر سوداګر بیا د دغو توکو د بیو لوړوالي لامل په پاکستان کې د افغان سوداګرو پر وړاندې رامنځته شوې ستونزې او همدارنګه د سالنګ لويې لارې بندېدل په ګوته کوي.
د ننګرهار سوداګرۍ خونې مسوولین وايي، اوسمهال د نرخونو د لوړوالي لامل ټرانسپورټي ستونزې دي.
د ننګرهار د سوداګرۍ او پانګونې خونې د مدیره پلاوي غړی زلمی عظیمي وايي: « زموږ اکثریت لارۍ د پاکستان په بندرونو کې ولاړې دي او د ستونزو له امله افغانستان ته نه شي راتلی. بله خوا، د ټرانسپورټېشن لګښتونه هم د سالنګ لویې لارې د تړل کېدو له امله ډېر شوي او بار وړونکي موټر په نورو خامه لارو راځي.»
له دې سره ننګرهار کې د نرخونو د کنټرول او احتکار کمیسیون مسوولین وايي، دوی وخت پر وخت پر بازار څارنه کوي او نه پرېږدي چې خلک په خپل سر د توکو نرخونه لوړ کړي.
د نرخونو د کنټرول او احتکار د مخنیوي کمیسیون غړی باز محمد ځوانمل وايي: « زه خپل ټول ولس ته ډاډ ورکوم، چې د نرخونو د کنټرول کمیسیون او زموږ خپل نظارت هېچا ته اجازه نه ورکوي، چې نرخونه په خپل سر جګ کړي.»
خلک ټینګار کوي،چې سرپرست حکومت باید افغان سوداګرو ته لا زیاتې اسانتیاوې برابرې او د سوداګرۍ لپار له پاکستان پرته په نورو بدیلو لارو کار وکړي، ترڅو افغان سوداګرو ته د توکو په واردولو کې خنډونه له منځه لاړ شي او د توکو نرخونه ثابت پاتې شي.
