د نجونو ښوونځیو له تړل کېدو یو کال پوره شو

ه هېواد کې له  یو کلن ځنډ وروسته لاهم د اسلامي امارت له لوري له شپږم ټولګي پورته د نجونو پرمخ د ښوونځيو دروازې بندې پاتې دي. 

سره له دې چې په دغه موده کې د اسلامي‌امارت چارواکو د ښوونځیو خلاصولو ژمنې کړي، خو لا نه دي عملي شوي.

ملګرو ملتونو په افغانستان کې د ښوونځیو په اړه خبرپاڼه خپره کړې او تیر ښوونیز کال یې له ننګونو او ستونزو ډک بللی دی.

افغانستان کې د ملګرو ملتونو سیاسي استازولۍ ( یوناما) سرپرست مارکس پوتزل وايي:« دا یوه غمجنه، د شرم وړ او په بشپړه توګه د مخنیوي وړ کلیزه ده. له شپږم ټولګیو پورته د نجونو روان محرومیت هېڅ ډول توجیه نه لري. د نړۍ هېڅ بل ځای کې داسې نه شته دی.» 

کارپوهان په دې باور دي،چې یاده ستونزه به ډېرۍ کورنۍ  دیته اړې کړي،چې د نجونو د زده کړو لپاره  د جلا وطنۍ لاره غوره کړي.

د سیاسي چارو کارپوه فضل الله ممتاز وايي:« د افغانستان ډېری وګړي اړ کېږي څو خپل هېواد د ښوونې له کبله پرېږدي. ایا دا مو درک کړې چې اوس په هره کورنۍ کې اروايي ناروغۍ رامنځته شوې. د مور او پلار او اولادونو تر منځ یې نفسي او ټولنیزې ستونزې را پیدا کړې. د دې مخنیوي لپاره باید د ا.ا.ا مسوولین په دې تړاو بېړني اقدامات ترسره کړي او ښوونځي دې پرانیزي.» 

ښوونکې هم اندیښنه لري او له اسلامي امارته غواړي،چې نور دې ښوونیز بهیر نه ځنډوي او نجونو ته دې اجازه ورکړي،چې ښوونځيو ته  ولاړې شي.

ښوونکې حسنا رسولي وايي:« څه باندې یو کال کېږي چې نجونې له ښوونځیو محرومې دي. په ځینو سړو ولایتونو لکه کابل کې له نجونو د تعلیم حق اخیستل شوی او د ښوونځیو دروازې تړلې دي. په ځینو تودو ولایتونو لکه ننګرهار کې ښوونځي پرانیستل شوي خو نجونو ته د تعلیم حق نه دی ورکړل شوی. د کورنیو او قومي مشرانو غوښتنه دا ده څو ا.ا.ا د نجونو ښوونځي پرانیزي او دوی ته د ښوونې حق ورکړي.» 

واک ته د اسلامي‌امارت له رسیدو وروسته د نجونو پرمخ متوسطه او لیسې تړل شوي او نجونو ته اجازه نه ورکول کیږي،چې ښوونځيو ته ولاړې شي.

دغې پرېکړې پر کوردننه او نړیواله کچه غبرګونونه پارولي او په ټوله کې غوښتنه له اسلامي امارته دا ده،چې زده کړې د نجونو اساسي حق دی او دغه حق دې ورکړل شي.