Skip to content
د هېواد په یو شمیر سیمو کې له شپږم ټولګي پورته د نجونو پرمخ د ښوونځيو دروازو پرانېستل کېدل، له هرکلي سره مخ شوي.
تازه په سویل پکتیا ولایت کې له شپږم ټولګي پورته د نجونو څو بابه ښوونځي پرانېستل شوي او د نجونو ته د زده کړو اجازه ورکړل شوې ده.
خلکو دا اقدام ستایلی دی او په ټول هېواد کې یې له شپږم ټولګي پورته د نجونو لپاره د لیسو د پرانېستلو غوښتنه کوي.
د سیاسي شنونکي په یو شمیرسیمو کې د ښوونځيو پرانستل ښه اقدام یادوي او زیاتوي، که سرپرست حکومت په ټول هېواد کې د نجونو متوسطه او لیسې پرانیزې،کابل به له نړۍ سره د سیاسي تعامل برخه کې نږدې شي.
د سیاسي چارو کارپوه طارق فرهادي وايي:« نړۍ او د افغانستان خلک له مرکزي حکومت او پوهنې وزارت غواړي،څو د کتاب، لوست او ښوونځيو په تړاو پاملرنه وکړي. د نجونو ښوونځي پرانیزي او نړۍ هم دې ته په تمه ده،چې د نجونو ښوونځي پرانېستل شي،څو دوی هم د حکومت په اړه خپله پرېکړه وکړي.»
د ښوونځی ښوونکې بیا وايي،د نجونو پر وړاندې له شپږم ټولګي پورته د ښوونځیو دروازې تړلې پاتې د، انجونې له یوه کال زده کړو بې برخې شوي او پر وینا یې له حکومته غواړي،چې نور دې د ښوونځیو دروازې بندې نه ساتي.
ښوونکې حسنا رسولي وايي:«له شپږم ټولګي پورته نجونې له ډېرو ستونزو سره مخ شوي. د ښوونې له حقه لرې پاتې دي. له ا.ا.ا مو غوښتنه دا ده،څو د ټول هېواد پر کچه د نجونو ښوونځي پرانیزي. په ځینو سیمو کې چې ښوونځي پرانېستل شوي،دا ډېر د خوښۍ ځای دی.»
بل لورته زده کوونکې په یو شمیر سیمو کې د ښوونځیو پرانېستلو کېدو ته خوشاله دي وایي، دولت دې په ټول هېواد کې د نجونو پر وړاندې د ښوونځیو دروازې پرانیزي.
یوه زده کوونکې وايي:« نورو ولایتونو کې یعنې ډېرې خوشالۍ شوي دي،چې ښوونځي پرانېستل شوي دي. موږ له اسلامي امارته غواړو،چې د نجونو پر مخ ټول ښوونځي پرانېستل شي.»
یوه بله زده کوونکې بیا وايي:« افغان نجونې له ډېرو ستونزو سره په تېره بیا روحي ستونزو سره مخ شوي دي.»
بل لورته د اسلامي امارت ویاند ذبیح الله مجاهد وایي،د ښوونځيو د پرانېستلو په تړاو لاهم پریکړه نه ده نهایي شوي.
په ورته وخت کې مجاهد وايي،د امکاناتو په برابریدو به په ټول هېواد کې ښوونځي پرانیزي.
هغه زیاته کړې:« په ټولو ولایتونو کې ښوونه او روزنه اړتیا ده. ان شاء الله کله چې اجازه وشي او شرایط برابر شي، پوهنې وزارت به په ټول هېواد کې یو شان ښوونځي پرانیزي. د پکتیا موضوع لا څېړنې ته اړتیا لري،چې څنګه او د چا په اجازه پرانېستل شوي.»
دا په داسې حال کې ده،چې د اسلامي امارت له راتګه له یو کال ډېر وخت واوښت،خو لاهم له شپږم ټولګي پورته د نجونو پر وړاندې د ښوونځيو دروازې تړلې پاتې دي او یوازې د شمال په څو ولایتونو او تازه د پکتیا مرکز ګردیز کې څلور بابه ښوونځي پرانېستل شوي دي.
