د ناټو سرمنشي ینس سټولټنبرګ اعلان وکړ،چې په راتلونکو دوه ورځو کې د ناټو غړو هېوادونو بهرنیو چارو وزیران سره راټولیږي او د نړۍ پر بېلابېلو مسایلو به بحثونه کوي.
دغه ناسته چې د روانې نومبر میاشتې پر ۳۰مه به پیل شي او د ډسمبر تر لومړۍ نیټه به دوام وکړي، د افغانستان روان کړکیچ په تړاو به هم په کې بحثونه او پرېکړې وشي.
سټولټنبرګ وايي:« د ناټو بهرنیو چارو وزیران به د افغانستان د موضوع په تړاو هم خبرې وکړي. موږ به د تېر حکومت پر ناڅاپي سقوط او د نظامیانو پر ماتې بحثونه وکړو. موږ هلته د خپل شتون په تړاو یوه پراخه ارزونه کړې ده. موږ هلته ډېره قرباني هم ورکړه او د خپلې موخې پورې مو فعالیت وکړ، خو هرڅه بېرته شاته وګرځيدل او دا هغه څه دي،چې موږ یې باید د راتلونکي لپاره زدکړو.»
سټلټنبرګ د ژمي له راتګ سره د افغان وګړو پر بد وضعیت اندیښنه څرګنده کړه،خو خوښي یې وښوده، چې د ناټو یو شمېر غړو هېوادونو له افغانانو سره بشري مرستې کړي او لاهم هڅې کوي،چې روان بحران مهار کړي.
سټولټنبرګ زیاتوي:« افغانستان اوس مهال له یوه ستر بشري ناورین سره مخ دی. په داسې حال کې چې ژمی هم را روان دی، د افغانستان ګڼ شمیر وګړي د خوړو او سرپناه لپاره څه نه لري. زه خوښ یم،چې د ناټو غړي هېوادونه او یو شمیر نور خیریه بنسټونه هڅه کوي،چې له هغوی سره بشري مرسته وکړي او دا ډېره اړینه ده،چې له بشري پلوه غړي هېوادونه هغوی سره کړې ژمنې عملي کړي.»
اخو د اروپايي کمېسیون مشرې ارزولا فون درلاین هم ټینګار کړی دی،چې له افغان ولس به ملاتړ کوي خو په وینا یې لازمه نده چې دغه مرسته او ملاتړ دې، پر دې مشروط وي چې دلته دې حکومت په رسمیت وپيژندل شي.
درلاین زیاته کړه:« اروپايي ټولنه باید له افغانستانه د وګړو ملاتړ وکړي،چې هغوی له ټولنیز او اقتصادي ماتې سره مخ دي. اړینه نه ده،چې دا مرستې او ملاتړ دې وروسته له هغې وشي،چې د افغانستان حکومت پر رسمیت وپیژندل شي.»
دا خبرې داسې مهال کېږي،چې پرون شپه روسيې،چین او هند هم د افغانستان په اړه یوه پرلیکه ناسته کړې،چې اجنډا یې په افغانستان کې بشري ناورین، د ترهګرۍ ګواښ او د مخدره توکو د پراختیا پر وړاندې پر مبارزې متمرکزه وه.
