د ناروې کډوالو شورا په ایران کې د هغو افغان کډوالو د ژوند په اړه ژوره اندېښنه څرګنده کړې چې پر دې هېواد د امريکا او اسرایيلو بريدونو له امله اغېزمن شوي.
د دې شورا ریيس په ايران کې د مېشتو افغانانو د وضعيت اروزولو لپاره ياد هېواد ته تللی او د خپلو ارزونو په پایله کې يې جوته کړې چې دا مهال هلته مېشت له څلور ميليونو ډېر افغانان بېړنيو بشري مرستو ته اړتيا لري.
یان اېګلنډ ویلي: « په ایران کې مېشت افغان کډوال له سختو ستونزو سره مخ دي. په دې هېواد کې له څلور میلیونو څخه ډېرو مېشتو افغانانو لپاره د لا ډېرې او بېړنۍ مرستې اړتیا شته.»
نوموړي افغان او ایراني ماشومانو ته په اشاره ويلي، دوی په ایران کې د وروستیو درنو بمباریو له امله له ژورو رواني اختلالاتو سره مخ شوي.
د هغه په خبره، د دوی ډېرو میندو او پلرونو ورته ویلي چې هغه لږ عاید یې هم د جګړو او اقتصادي بحران له امله له لاسه ورکړی چې مخکې یې درلود.
د ناروې کډوالو شورا رییس په دې اړه ویلي: « په ایران کې د سختو بمباریو او جګړو له امله افغان او ایراني ماشومان له سختو ستونزو سره مخ شوي. د بمباریو له امله ماشومان ډار شوي او له ژور خفګان سره مخ دي. د ګڼو ماشومانو کورنیو را ته وویل چې د جګړې له امله رامنځته شوي اقتصادي بحران په پایله کې یې هغه لږ عاید هم له لاسه ورکړي چې پخوا یې درلود.»
د چارو څارونکي بیا وایي، د امریکا، اسراییلو او ایران جګړې له امله ګڼ شمېر افغانان هلته له سختو اقتصادي ستونزو سره مخ دي او له اسلامي امارت غواړي چې خپل هېواد ته يې د خوندي راستنولو زمينه برابره کړي.
د اقتصادي چارو شنونکی محمد یونس ځدراڼ وايي: « په ایران کې د جګړې له امله هم ایرانیان او هم زموږ افغان تجاران او کډوال متضرر شول. هلته زموږ ډېری کارګر هېوادوال له بېکارۍ سره مخ شوي او اقتصادي ستونزې هم لري. د افغانستان اوسني حکومت ته دا ښه موقع ده چې خپل خلک را دعوت کړي او له مسلکونو څخه یې په خپل هېواد کې کار واخلي.»
د کډوالو د حقونو مدافعان بیا وایي، په سیمه او نړۍ کې د روانو جګړو او سیاسي بېثباتیو له امله افغان کډوال له سختو ستونزو سره مخ شوي او زياتوي چې اوسمهال اړتیا ده چې په دې ډول شرایطو کې د افغان کډوالو لاسنیوی وشي.
د کډوالو حقونو مدافع ګلاخان بهادري وايي: « دا ښکاره خبره ده چې ایران کې د جګړو له امله هلته مېشت افغانان له سختو اقتصادي، رواني او ټولنیزو ستونزو سره مخ شوي. د هغوی د ملاتړ لپاره اړینه ده چې خوراکي توکي، سرپناه، روغتیايي او رواني خدمتونه په منظم ډول ورته برابر شي. د دوی ماشومانو ته باید د زده کړو او ښځو ته د کار زمینه برابره شي. نړیواله ټولنه او مرستندویه ادارې باید له دغو کډوالو سره خپلې بشري مرستې زیاتې او د ښه راتلونکي لپاره لا زیات اړین ګامونه پورته کړي.»
ایران له څو لسیزو راهیسې د میلیونونو افغان کډوالو کوربه توب کوي، خو په هغه هېواد کې اقتصادي ستونزو او له امریکا- اسراییلو سره وروستۍ جګړې د دغو کډوالو وضعیت نور هم ستونزمن کړی.
