له پاکستان او ايرانه د افغان کډوالو د جبري اخراج پر دوام، د ناروې کډوالو شورا په يوه تازه راپور کې په کور دننه د بې ځايه شویو افغانانو وضعيت کړکېچن بللی.
په دې راپور کې جګړې، اقتصادي بي ثباتي او د اقليمي بدلون ناوړه اغېزې د داخلي بې ځايه کېدو اصلي عوامل ياد شوي او په کې راغلي چې دامهال په کور دننه له يو ميليون ډېر افغانان لاهم بېځايه شوي او بېرته خپلو مېنو ته د ورګرځېدو لپاره ورته زمينه نه ده برابره شوې.
د راپور یوه برخه:« افغانستان د هغو هېوادونو په ډله کې دی چې وګړي يې د جګړو، تاوتريخوالي او طبيعي پېښو لکه سېلابونو، زلزلو او وچکالیو له امله بې ځايه شوي دي. دا پېښې له تېر کال راهيسې اوس هم دوام لري. په ۲۰۲۴ زېږدیز کال کې د داخلي بېځایه کېدنو ۳ زره۲۰۰ پېښې ثبت شوې چې له امله یې شاوخوا ۱.۳ ميليون کسان لاهم په داخلي توګه بې ځايه دي.»
د سرپرست حکومت چارواکي دا راپورونه بې اساسه بولي او وايي، داخلي بې ځايه شوي په ښه وضعيت کې دي او ځانګړې پاملرنه ورته شوې.
دوی له نړيوالو سازمانونو غواړي چې يادو بې ځايه شویو کورنيو ته د لا ښې رسېدنې لپاره ورسره همکاري وکړي.
د اقتصاد وزارت مسلکي معين عبداللطيف نظري وايي:« اسلامي امارت د کورنیو بېځایه شویو وضعیت ته جدي او بشپړه پاملرنه لري او زموږ هغه هېوادوال چې د مختلفو ستونزو له امله په داخلي حوزه کې بې ځایه شوي، اوس په مطلوب وضعیت کې دي. موږ غواړو دغو کسانو ته هر اړخیز امکانات برابر او په لاسرسي کې ورکړو.»
په ورته مهال، د بشري حقونو ځينې مدافعان په دې باور دي چې يو شمېر افغانان څو ځله د بېلابېلو ننګونو له امله د خپلو مېنو پرېښودو ته اړ شوي.
دوی له سرپرست حکومت او نړيوالو غواړي له يادو بې ځايه شویو سره مرسته وکړي.
د بشري حقونو مدافع محمد خان طالبي محمدزی وايي: « د کورنیو بېځایه شویو په اړه د افغانستان د اوسني حکومت له خوا د کره او منظیم سیاست نه شتوالي له امله، دغو کسانو ته ګڼ شمېر ننګونې رامنځته شوې دي. نړیوال سازمانونه او ملګري ملتونه باید له اوسني حکومت سره پر ګډه د یوه داسې مکانېزم په جوړولو کار وکړي چې له ثبات او غېزمنتوب برخمن وي.»
د راپورونو له مخې، افغانستان د هغو هېوادونو په ډله کې دی چې د داخلي جګړو، اقتصادي بې ثباتيو او د اقليمي بدلون ناوړه پايلو له امله يې ډېری وګړي په کور دننه بې ځايه شوي دي.
