د ملګرو ملتونو کارپوهانو یوې ډلې له اسلامي امارت غوښتي چې ژر تر ژره هغه مېرمنې له بنده ازادې کړي چې د حجاب د نه مراعت له امله په دې وروستیو کې نیول شوي دي.
د یاد سازمان راپور کې دغه نیونې خپلسرې او د بشري حقونو ښکاره نقض او د افغان مېرمنو د ازادیو سلبول بلل شوي.
یادې ډلې له اسلامي امارت غوښتي چې د مېرمنو پر وړاندې د تبعیضي چلن کنوانسیون په ګډوڼ د بشري حقونو ټول نړیوال اصول مراعت کړي او په دې برخه کې خپلې ژمنې عملي او خپل مکلفیتونه ادا کړي.
د راپور یوه برخه:« موږ له طالبانو غواړو، چې د حجاب د مسلې پر سر خپلسرې نیونې او د هغوی ازادیو له محرومولو لاس واخلي، چې دوی پر مېرمنو لګولي او په بېړني ډول ټولې هغه مېرمنې بېرته له بنده ازدې کړي، چې دا مهال د دوی له لوري بندیانې شوي.»
په ورته مهال د ملګرو ملتونو ځانګړي راپور ورکوونکي ریچارډ بېنېټ هم ورته غوښتنه کړې.
بېنېټ دغه کار له بشري حقونو سره په ټکر کې بللی او په خبره یې ورته کړنې کولی شي په راتلونکې کې د بنسټیز تبعیض دوام ته لار هواره کړي.
هغه زیاته کړې:« د ملګرو ملتونو له کارپوهانو سره یو ځای، زه هم له طالبانو غواړم چې د بدحجابۍ په تړاو د مېرمنو او نجونو خپلسرې نیونې ودروي، چې له بشري حقونو څخه سرغړونه ده. دغه کار د تبعیض بنسټیز سیسټم ته دوام ورکوي.»
خو د اسلامي امارت ویاند ذبیح الله مجاهد په هېواد کې د بېحجابۍ په تړاو د افغان مېرمنو نیول په کلکه ردوي او د ملګرو ملتونو دغه راپور ناسم، له واقعیته لرې او د کمزورو مالوماتو پر اساس بنا شوی بولي.
د مجاهد په خبره، دا مهال په دې تړاو د حکومت په بندخونو کې هېڅ مېرمنه نشته ده.
مجاهد زیاتوي: « دا ډېر د تاسف ځای دی چې کارپوهان په دومره ضعیفو مالوماتو استناد کوي. تراوسه نه ښځېنه نیول شوې دي او نه یې په زندان کې لرو، البته په ابتدا کې یو دوه قضیې پېښې شوې وې، چې هغه هم د اصلاح په بڼه وې د نیولو او توقیف خبره نه وه، توصیه وه او د دوو ساعتونو لپاره مېرمنې توصیه شوې وې؛ نور نو نه څوک نیول شوي نه ځورول شوي، په دې تړاو خپاره شوي راپورونه ناسم دي.»
د ښځو د حقونو برخې یو شمېر فعالانې بیا په هېواد کې د افغان مېرمنو د حقونو غوښتنې له له سرپرست حکومت کوي او زياتوي، چې مېرمنو ته د حقونو د ورکړې او ورسره د چلن په برخه کې له احتیاط کار واخلي.
د ښځو د حقونو برخې فعاله روح ګل افغان وايي: « اسلامي امارت دې ژر تر ژره په اساسي قانون کار وکړي او د ټولو اتباعو حقوق دې په کې درج کړي او ښځینه په کې باید عمده رول ولري.»
دا په داسې حال کې ده چې له دې وړاندې په خواله رسنیو ګڼې داسې ویډیوګانې لاس په لاس کېدې چې په کې لیدل د امر بالمعروف وزارت یو شمېر محتسبینو په کابل کې چې دقیق ځای یې څرګند نه دی یو شمېر ښځې د حجاب د نه مراعتولو په تړاو نیسي او پوځې وسایطو ته یې پورته کوي.
