د ملګرو ملتونو د امنیت شورا د بندیزنوو کمېټې د تحلیل او څارنې ډلې په ۳۲ راپورکې چې د روانې جولای میاشتې پر ۲۵مه خپور شوی دی، راغلي چې اسلامي امارت لاهم له القاعدې ډلې سره خپلې اړیکې نه دي پرې کړي او دغه ډله له سرپرست حکومت سره نږدې اړیکې پالي.
په راپور کې ویل شوي چې یاد ډله د دې لپاره په افغانستان د سترګو پناه فعالیتونه کوي چې له ترهګرۍ سره د مبارزې په برخه کې د اسلامي امارت کړو ژمنو ته زیان ونه رسېږي.
د امنیت شورا راپور یوه برخه:« د طالبانو او القاعدې ډلې تر منځ اړیکې لا هم په خپل نږدې حالت کې دي. دغه ډله تر ډېره په افغانستان کې خپل کارونه په پټه ترسره کوي، ترڅو د طالبانو هغې خبرې ته باور زیات کړي چې د افغانستان خاوره د تروریستي موخو لپاره نه کارول کیږي. خو په حقیقت کې د القاعدې ډله د طالبانو د لوړپوړو چارواکو تر ملاتړ لاندې د افغانستان قانون پلي کوونکو او نورو عامه ادارو ته نفوذ کوي.»
د ملګرو ملتونو امنیت شورا په دې راپور کې افغانستان د القاعدې ډلې ایډیولوژیکي او لوژسټیکي مرکز بللی شوی چې په وینا یې دغه ډله دمګرې د افغانستان په کونړ او نورستان ولایتونو کې د روزنځایونو پر جوړلو بوخته ده، ترڅو د خپلو بهرنیو عملیاتو لپاره خپل ځواک پیاوړی کړي.
د امنیت شورا راپور یوه برخه:« دغه ډله له افغانستان څخه د یوه ایډیالوژیکي او لوژسټیکي مرکز په توګه کار اخلي، ترڅو په پټه د نويو جنګیالیو د جلب او جذب او ګومارنې لپاره د خپلو بهرنیو عملیاتو لپاره خپل ځواک پیاوړی کړي. القاعده دا مهال د ځان د تنظیمولو په حالت کې ده او د افغانستان په کونړ او نورستان ولایتونو کې د روزنځایونو پر جوړولو بوخته ده.»
راپور کې ویل شوي، لا هم په افغانستان کې شااوخوا ۲۰ وسله والې ډلې فعالیت لري او د دوی د ارزونو له مخې القاعده غواړي له دې ځایه د سیمي او نړۍ هېوادونو ته خپل نفوذ زیات کړي.
د امنیت شورا راپور یوه برخه:« د ملګرو ملتونو د غړو هېوادونو د ارزونې له مخې افغانستان لا هم په نړیواله کچه د ترهګرو ډلو تر ټولو خوندي ځای یادیږي. دا مهال لا هم شااوخوا ۲۰ ترهګرې ډلې په دې هېواد کې فعالیتونه کوي. ارزونه دا ده چې دغه ډلې غواړي له دې ځایه خپل نفوذ د سیمې او نړۍ هېوادنو ته وغځوي.»
خو څو اونۍ وړاندې د امریکا ولسمشر جو بایډن بیا د ترهرګرو ډلو پر وړاندې د اسلامي امارت غوڅ دریځ ستایلی وه او له دې ډلې سره د سرپرست حکومت مبارزه يې بریالۍ بللې وه.
د نظر خاوندان په افغانستان کې د ترهګرۍ په تړاو د نړیوالې ټولنې او ملګرو ملتونو د نظرونو پاشلتیا او د دریځونو کاواکي د اذهانو د مغشوشولو په مانا بولي.
خو د اسلامي امارت ویاند ذبیح الله مجاهد بیا د ملګرو ملتونو امنیت شورا دا راپور رد کړی دی.
مجاهد پر خپله ټویټرپاڼه لیکلي:« د امنیت شورا هغه راپور حقیقت نه لري چې په کې ادعا شوې اسلامي امارت له القاعدې سره اړیکې لري. د القاعدې تنظیم اوس په افغانستان کې هېڅ ډول شتون نه لري، په دې اړه راپورونه ناسم دي. اسلامي امارت هېچا ته اجازه نه ورکوي چې د افغانستان خاوره د بل کوم هېواد د امنیت پر ضد وکاروي.»
اسلامي امارت په کراتو ویلي، په افغانستان کې هېڅ وسلواله ډله شتون نه لري او دوحې تړون له مخې هېچاته اجازه نه ورکوي چې خاوره یې د چا پر ضد وکارول شي.
