په کابل کې د یکشنبې پر ورځ د « ۱۴۰۰ کال د کب پر لومړۍ» د مکروريانونو د تدویر، حفظ او مراقبت دولتي شرکت مسوولینو،د مکروریانونو اوسېدونکو سره د ستونزو د حل او همداراز د پورونو راټولولو په اړه ناسته وکړه.
ناسته کې یاد شرکت د خپلو شپږو میاشتو لاسته راوړنو په تړاو مالومات ورکړل او پر هغو ستونزو سلا مشورې وشوې،چې د مکروریانونو اوسېدونکي او یاد شرکت ورسره مخ دی.
د مکرویانونو د تدویر او مراقبت شرکت مشر غلام عمر عبدالله وايي:« له لاسته راوړنو یوه دا ده،چې موږ غوښتل کوم سيستمونه چې د دې شرکت دي، هغه باید تجدید،نوي او بدل شي،سيتم یې،ځکه دا ډېر پخوانی سيستم دی، نو په دې برخه کې مو يوه طرحه د بیارغونې جوړه کړه. دا طرحه مو د روسیې سفارت له استازو سره شریکه کړه او ورسره مو د عوایدو په راټولولو کې ځینې عايداتي منابع فعاله کړې،چې مخکې غیرې فعاله وې.»
عبدالله مني،چې لسیزې پخوا د روسانو له خوا په جوړو شویو، مکروریانونو کې د مرکز ګرمۍ، اوبو او کانالیزاسیون برخه کې ستونزې زیاتې شوي او ډاډ یې ورکړ،چې د حل په موخه یې کابل کې د روسيې سفارت له چارواکو سره خبرې کړي دي.
عبدالله زیاتوي:«زموږ پر وړاندې لوی خنډ دا دی،چې سیستمونه ټول استحلاک شوي دي، او بند شوي دي. موږ هغسې چې د خلکو توقع او تمعه ده،هغسې خدمات نه شو ارايه کولای. نو د دې سيتسمونو د تغیر او تبديل له پاره لوی مالي امکاناتو او بوديجې ته اړتيا ده، فعلاُ شرکت دومره امکانات نه لري.»
