بهرنیو چارو وزارت وایي، د افغانستان او منځنۍ اسیا مشورتي خبرو اترو ناستې په پای کې هغه څو اړخیز سیاسي مکانېزم شریک کړای شو چې د دواړو لورو د جګپوړو چارواکو په خوښه رامنځته شوی. ګډونوالو ټینګار کړی چې دا څو اړخیز مکانېزم باید پیاوړی او دوامداره پاتې شي.
د افغانستان او منځنۍ اسیا مشورتي ناسته د بهرنیو چارو وزارت په نوښت جوړه شوې وه چې په کې د منځنۍ اسیا د پنځو هېوادونو چارواکو او ډېپلوماټانو ګډون درلود.
د دې وزارت له خوا خپره شوې اعلامیه کې ویل شوي چې د بهرنیو چارو وزیر مولوي امیرخان متقي د خپلو خبرو پرمهال ټینګار کړی چې د دې نوښت په رڼا کې دې د افغانستان او منځنۍ اسیا هېوادو څېړونکي د لارې یوه نقشه ترتیب کړي، ترڅو د افغانستان او منځنۍ اسیا هېوادونو د بېلابېلو مسایلو په تړاو ګډ لید لوري رامنځته شي.
د بهرنیو چارو وزارت د اعلامیې په یوه برخه کې راغلي: « دا څو اړخیز سیاسي مکانېزم چې د دواړو لورو د لوړپوړو چارواکو په خوښه رامنځته شوی، باید پیاوړی او دوامداره شي؛ د افغانستان او منځنۍ اسیا څېړنیز متخصصان دې په مناسب وخت کې ناسته وکړي او د دې نوښت په رڼا کې دې د لارې یوه نقشه ترتیب کړي او په چوکاټ کې یې دې د افغانستان او منځنۍ اسیا د ګډو امنیتي ستونزو په اړه د ګډ امنیتي لیدلوري پر سر بحث او د نظر تبادله وکړي. همداراز د دواړو لورو د سوداګریزو او ټرانزیټي همکاریو لپاره دې ګډ لیدلوری او همغږي رامنځته کړي.»
د بهرنیو چارو وزارت په اعلامیه کې همدا راز راغلي، د اقلیمي بدلون د منفي اغېزو مخنیوي لپاره دې په ګډه هلې ځلې وشي.
په دې ناسته کې ګډونوالو دغه نوښت اغېزناک بللی او د افغانستان بهرنیو چارو وزیر د وړاندیزونو ملاتړ یې کړی. د منځنۍ اسیا هېوادونو استازو هوډ کړی چې په ګډه به د دې وړاندیزونو پر عملي کولو کار وکړي.
د بهرنیو چارو وزارت په علامیه کې وړاندې ویل شوي، د منځنۍ اسیا د دغو پنځو هېوادونو استازو په داسې حال کې چې له افغانستان سره د اقتصادي، سوداګریزو او ټرانزیټي اړیکو د پیاوړې کولو لپاره د خپلو هېوادونو لېوالتیا څرګنده کړې، دغه راز یې د ترهګرۍ او قاچاق پر وړاندې هم د افغان حکومت د مبارزې ملاتړ څرګند کړی.
سیاسي شنونکي د بهرنیو چارو وزارت له لوري د افغانستان او منځنۍ اسیا د کنفرانس نوښت د منځنۍ اسیا له هېوادونو سره د سیاسي، اقتصادي، سوداګریزو او ټرانزیټي اړیکو د پراخولو لپاره خورا مهم بولي.
د شنونکو په باور، داسې کنفرانسونه په سیمه کې د امنیتي ستونزو په تړاو شته اندېښنې هم رفع کولی شي.
د سیاسي چارو شنونکی اختر محمد راسخ وايي: « زما په اند، دغه ناسته د افغانستان اسلامي امارت د رسمیت پېژندنې، د غوره ډېپلوماټیکو اړیکو ټینګولو، د تجارت او ټرانزیټ لپاره د لارو لټولو لپاره یوه ګټوره او پرځای ناسته وه. اسلامي امارت په دې ناسته کې د هغو تشویشونو لرې کولو مثبته هڅه وکړه چې منځنۍ اسیا یې د ترهګرۍ له ادرسه لري.»
د افغانستان او منځنۍ اسیا پنځو هېوادونو د استازو ترمنځ مشورتي ناسته داسې مهال جوړیږي چې له یوې خوا افغانستان او پاکستان ترمنځ اړیکې خرابې دي او ان د دواړو لورو ترمنځ د وسله والو نښتو سبب هم شوې، له بلې خوا پر ایران د امریکا او اسراییلو بریدونو هم سیمه کې کړکېچ پراخ کړی.
د نړیوالو چارو شنونکي په دې اند دي چې اسلامي امارت باید د شرایطو حساسیت ته په کتو د سیمې او ګاونډ له هېوادونو سره د خپلو اړیکو پراخولو او پیاوړي کولو لپاره لا زیاتې هلې ځلې وکړي.
