د ملګرو ملتونو پراخيتايي پروګرام له لوري په خپور شوي راپور کې ویل شوي چې افغانستان له سوريي وروسته دوهم هغه هېواد د ی، چې زيات شمیر کورني بې ځایه شوې لري.
راپور کې وړاندې ویل شوي چې دا مهال افغانستان ۶.۵۵ ميلیونه کورني بې ځایه شوي کسان لري.
په راپور کې د کورني بې ځایه شویو د زياتوالي لامل دومدارې جګړې ، وچکالي او طبیعي پیښې بلل شوي دي.
د راپور یوه برخه:« افغانستان اوس مهال ۶.۵۵ میلیونه کورني بې ځایه شوي کډوال لري، چې له سوریې وروسته د نړۍ پر کچه دویم هېواد دی.»
دا په داسې حال کې ده، چې له دې وړاندې د کډوالۍ نړۍوال سازمان هم ویلي وو، په افغانستان کې د بې ځایه شویو کسانو شمېر شااوخوا ۶ میلیونو ته رسېږي.
د سیاسي چارو شنونکي بیا نیوکه کوي چې له کلونو راهیسې په کور دننه د ګډوالۍ مخنيوي لپاره د اړتيا وړ هڅې نه دي شوي او نه هم هغه لاملونه څيړل شوې چې د داخلي بې ځايه کيدو مخنيوی پرې وشي.
د سیاسي چارو شنونکی مقصود حسن زاده وايي: « د طبیعي پېښو، لکه، زلزله، سېلاب او وچکالۍ له امله یې خپل کورونه له لاسه ورکول، اوسمهال د افغانستان په یو شمېر ولایتونو، لکه نیمروز او داسې نورو کې چې وچکالي راغلې خلکو خپل کورونه پرېښي او داسې ځایونو ته تللي چې هلته اوبه وي، دغو ټولو مهاجرتو بیا هم د افغانانو ستونزې زیاتې کړي او دا خلک چې غریب وو لا زیات پسې غریب شول او د نړۍ والې ټولنې جدي مرستو ته اړتیا لري.»
خو په ورته وخت کې د سیاسي چارو شنونکی شمس احمدزی بیا د داخلي بې ځایه شویو د ژوند خونديتوب لپاره غوښتنه کوي چې د ګډوالۍ نړيوال سازمان او مسوولې ادارې د سرپنا جوړولو او کډوالو ته د خوراکي توکو برابرولو په برخه کې له دوی سره دومدارې مرستې وکړي.
احمدزی زیاتوي:« اوس مو د موجوده حکومت په همکارۍ له نړیوالو سازمانونو غوښتنه دا ده، چې په دغو برخو کې زموږ د هېوادوالو لاس نیوی وکړي او دوی ته یو معلوم برخلیک وټاکي ترڅو دوی له خپلو حقه حقوقو برخمن شي، ترڅو دوی ( کډوال) چې اوس په خوراکي او روغتیايي برخه کې چې له کومو ستونزو سره لاس او ګرېوان دي له هغې خلاص شي.»
د ملګرو ملتونو د پراختیايي پروګرام په دغه راپور کې دغه راز تر راتلونکو ۳۰ کلونو په ټوله نړۍ کې د بې ځایه کېدو د احتمال زیاتوالي په تړاو هم خبرداری ورکړل شوی دی.
هڅه مو وکړه چې د کورني بې ځایه شویو په تړاو د ملګرو ملتونو د پراختیايي پروګرام د وروستي راپور په اړه د کډوالو او راستنیدونکو چارو وزارت نظر هم ولرو خو د یاد وزارت ویاند عبدالمطلب حقاني له پرلپسې اړيکو ورړسته هم خبرو کولو ته حاظر نه شو.
