د ملګرو ملتونو امنیت شورا وړمه ورځ په افغانستان کې د خپلې سیاسي استازولۍ (یوناما) ماموریت د راتلونکې ۲۰۲۵ زېږديز کال د مارچ تر ۱۷مې پورې تمدید کړ.
د امنیت شورا له لوري په خپره شوې خبرپاڼه کې راغلي، تر هغې چې افغانستان په بشپړه توکه سولې او ثبات ته رسېږي، له سرپرست حکومت سره به خپل ماموریت ته دوام ورکوي .
د خبرپاڼې یوه برخه:« په ناسته کې ټولو د ۲۷۲۷ پرېکړهلیک په تصویبولو سره، په افغانستان کې د یوناما او د ملګرو ملتونو د نورو ادارو، بسپنو، پروګرامونو د دوام پر اهمیت ټینګار وکړ او له ټولو وغوښتل شول، چې له یوناما سره همغږۍ ته دوام ورکړي. د ملګرو ملتونو له سرمنشي غوښتنه کېږي، چې د دې هېواد او د یوناما د فعالیتونو په اړه هر درې میاشتې وروسته راپور چمتو کړي.»
په افغانستان کې د یوناما د ماموریت غځولو په اړه پرېکړهلیک جاپان چمتو کړی وه.
په ملګرو ملتونو کې د جاپان استازي یامازاکي کازیوکي ویلي، له سرپرست حکومت سره د نړیوالې ټولنې د تعامل لپاره د یوناما ماموریت مهم دی .
د کازیوکي په خبره، ملګري ملتونه به له هغو افغانانو سره چې په سختو شرایطو کې دي، خپل ملاتړ ته دوام ورکړي.
هغه زیاته کړې:« له طالبانو سره د نړیوالې ټولنې تعامل یوه مهمه اړتیا ده، چې ملګري ملتونو به د امنیت شورا په ملاتړ له افغانانو سره پر سختو شرایطو کې پاتې شي او په دې برخه کې به نه ستړې کېدونکو هلو ځلو ته دوام ورکړي.»
په ورته مهال د سرپرست حکومت چارواکي وايي، په افغانستان کې د ملګرو ملتونو د سیاسي استازولۍ د ماموریت له غځولو ملاتړ کوي .
دوی زیاتوي، هیله لري چې دغه استازولي به د افغانستان رښتینی انځور نړی ته وړاندی کړي.
د اسلامي امارت ویاند ذبیح الله مجاهد وايي:« د افغانستان اسلامي امارت د یوناما له فعالیت سره موافق دی چې یو کال نور هم تمدید کېږي. اسلامي امارت به ورسره همکار وي، لکه څرنګه چې په تېر دوه نیم کاله کې ورسره همکار پاتې شوی دی. غوښتنه مو دا ده چې دوی ( یوناما) وشي کولی چې په ښه ډول خپل ماموریت ترسره کړي او په ځانګړي د افغانستان او ملګرو ملتونو ترمنځ د اړیکو د لا پياوړتیا او ښه والي لپاره کار وکړي. د ډ یپلوماتیک پرمختګ برخه کې دنده لري چې ترسره یې کړي.»
بل خوا د سیاسي چارو یو شمېر کارپوهان بیا د یوناما د ماموریت غځېدل مثبت ګام ګڼي او له دغه سازمان غواړي، چې د نړۍ قدرتونو ته د وسیلې په توګه خپل ماموریت پر افغانانو تحمیل نه کړي.
په ملګرو ملتونو کې د چین استازي ګنګ شوانګ، چې دغه پرېکړه لیک ته یې مثبته رایه ورکړې ویلي، د ملګرو ملتونو سیاسی استازولۍ ماموریت د افغانستان په موجوده وضعیت کې هېڅ ډول بدلون نه دی راوستی.
بل پلو، د امریکا په ګډون ګڼو هېوادونو بیا د یوناما د ماموریت له تمدید سره له ملاتړ سربېره غوښتنه کړې، چې دغه ماموریت به په افغانستان کې د بشري حقونو د اعادې او له ټولو ملي او سیاسي لوریو سره د خبرو زمینه رامنځته کړي.
