کابل کې د افغاني سرې مياشتې ټولنې له خوا د ملک سلمان خيريه بنسټ له لوري افغانانو سره د ۱۰۰ ټنو خرما د مرستې لپاره مراسم نیول شوي.
د سرې میاشتې ټولنې سرپرست شهاب الدین دلاور له سعودي عربستان له مرستې د هرکلي ترڅنګ وايي، افغانستان له څو لسيزو جګړو او اقليمي بدلون وروسته د بل هر وخت پرتله د نړيوالو بشري مرستو ته اړتيا لري.
دلاور زیاته کړې:« نن ورځ د سعودي عربستان ورور، اسلامي او دوست هېواد له لوري افغاني سرې میاشتې ته ۱۰۰ ټنه خرما د تسلیمي شاهدان یو. افغانستان د تېرو پرله پسې کلنو جګړو، طبیعي پېښو او په دې وروستیو کې د اقلیمي بدلونونو له امله سخت ځپل شوی او پراخې همکارۍ ته اړتیا لري.»
دلاور د کابل او رياض ترمنځ سياسي او اقتصادي اړيکې ښې بولي او زياتوي، دواړه هېوادونه په خپلو کې پر ګډې عقيدې سربېره تاريخي مشترکات هم لري.
دلاور له افغانانو سره د سعودي عربستان له لوري شوې مرستې ستايي او د يادو مرستو د لا زياتوالي غوښتنه کوي.
د افغاني سرې مياشتې ټولنې سرپرست وايي: « افغانستان او عربستان له عقیدتي او فرهنګي اړخه ډېرې نږدې تاریخي اړیکې لري. سعودي عربستان تل دردېدلي او غم ځپلي افغان ولس ته د افغاني سرې میاشتې له لارې د ورورۍ او مرستې لاس ورکړی. زه هیله لرم چې د ورته بشر پالو مرستو لړۍ نوره هم پراخه شي او د عربستان ورور هېواد له موږ سره په نورو برخو کې هم مرستې وکړي.»
په همدې حال کې په کابل کې د سعودي عربستان شارژدافیر فیصل بن طلق البقمي هم ډاډ ورکوي چې هېواد به يې له اړمنو افغانانو سره خپلو بشري مرستو ته دوام ورکړي.
هغه زیاته کړې:« موږ د سرې مياشتې چارواکو له هرکلي مننه کوو او د ملک سلمان خيريه بنسټ له لوري له افغانانو د مرستو ستاينه هم کوو او دغه راز له افغانانو سره د سعودي عربستان د مرستو دوام په اړه ډاډ ورکوو.»
د ملک سلمان خيريه بنسټ له دې وړاندې هم په بېلابېلو برخو او په ځانګړې توګه د اقليمي بدلون ناوړه پايلو له امله له زيانمنو افغانانو سره بشري مرستې کړې دي.
