د رياست الوزر اقتصادي مرستيال ملا عبدالغني برادر اخوند پر مشرۍ يو لوړ پوړی پلاوی د ایران په بلنه ياد هېواد ته تللی دی.
د ریاست الوزرا اقتصادي مرستیالۍ له لوري په خپره شوې خبر پانه کې ويل شوي، چې د دې سفر په لړ کې به ملا عبد الغني برادر له ایراني چارواکو سره د دوه اړخیزو اړیکو پر پراختيا، سيمهيیز اتصال او د دواړو هېوادونو ترمنځ د سوداګرۍ پر زياتوالي خبرې اترې وکړي.
د خبرپاڼې یوه برخه:« د ریاست الوزراء اقتصادي مرستیال او مل پلاوی د ایران اسلامي جمهوریت له چارواکو سره د دوه اړخیزو اړیکو، سوداګرۍ، ټرانزېټ، ټرانسپورټ، زېربناوو، رېل پټلۍ، سیمهییز اتصال، چابهار بندر له لارې د سوداګرۍ پر زیاتوالي، په دې بندر کې د افغانستان د ښکېلتیا د پراختیا او د دواړو هېوادونو ترمنځ د اقتصادي همکاریو د پراختیا په اړه خبرې اترې وکړي او د یران خصوصي سکټور به په افغانستان کې د کرنې، کانونو، ټرانسپورټ او صنعت سکټور کې پانګونې ته را وبولي.»
خو د اسلامي امارت ویاند ذبیح الله مجاهد بیا وايي، په دې سفر کې به ملا عبدالغني برادر د اقتصادي او سوداګریزو مسايلو تر څنګ په دې هېواد کې د افغان ګډوالو پر ستونزو او دغه رزا د دواړو هېوادونو ترمنځ د شريکو پولو د ښه امنيت ټینګت په تړاو هم خبرې وکړي.
مجاهد زیاتوي: « د افغانستان په سوداګرۍ، کډوالو او د سرحدونو امنیت په اړه به چارواکو سره خبرې وکړي. همداراز د ریل پټلۍ او نور هغه موضوعات چې زموږ او ایران ترمنځ مشترک دي په هغو ټولو پرمختګونو به بحث کېږي.»
د سیاسي چارو شنونکي دا ډول سفرونه له ارزښت خالي نه بولي او په باور يې د سوداګریزو متبادلو لاور پیاوړي کول، د افغان مهاجرو ستونزو ته رسېدنه، او د سياسي اړيکو پراختيا به د دې رسمي سفر او ناستو اجنډا وي.
د سياسي چارو شنونکی شهسوار سنګروال وايي: « څو ورځې وړاندې د اسلامي امارت ویاند وویل چې د افغانستان او پاکستان ترمنځ چې کومه سوداګری موجوده ده او یو څه ټکنی ده؛ نو په دې اړه به موږ په بدیلو لارو فکر وکړو؛ ښايي بدیله لاره همدا وي چې د ایران، هندوستان او افغانستان ترمنځ سوداګریزې اړیکې او پراختیا وي، د دې ترڅنګ به سیاسي موخې هم وي، ځکه چې له بده مرغه زموږ سیاسي ناندرۍ تر دې حده دي چې په سیاسي، اقتصادي، کلتوري او سوداګرۍ ټولو مناسباتو یې اغېزه کړې ده. درېیمه مسله ښايي د افغان کډوالو مسله وي.»
د رياست الورزا اقتصادي مرستيال دغه سفر داسي مهال کوي چې پاکستان نه یوازې د افغان پانګه والو پړ وړاندې ننګونې زياتې کړي بلکي له تیرې يو مياشتې راهيسې یې د افغان ګډوالو په جبر اېستلو بې رحمانه لړۍ هم پیل کړې ده دا هغه څه چې شنونکي د دې سفر د تګ اړتيا بولي.
