د افغانستان مخکېني حکومت پوځي جنرال سمیع سادات،چې امریکا ته تښتیدلی وايي، له اختر وروسته به پخوانیو پولیسو،ملي امنیت او ملي اردو غړو ته به انسجام ورکړي او د سیاسي فعالیت ترڅنګ به په افغانستان کې وسله واله فعالیتونه هم پیل کړي.
سادات زیاته کړې:«له اختر وروسته به د هر چا کارونه او مسولیتونه سره مالوم کړو،که خدای کول بېرته به راوګرځیږو او د خپل هېواد لپاره به عملي اقدامات وکړو،چې سیاسي فعالیت،مدني حرکت او متاسفانه په دې کې وسله واله فعالیتونه هم شته دي،چې بله چاره هم نه لرو.»
د افغانستان اسلامي امارت د ویاند مرستیال انعام الله سمنګانی بیا وايي، سمیع سادات او هغه ته ورته نور تقلبي جنرالان که دومره تکړه وای،نو د سل ملیارده ډالرو په ارزښت او د ۵۰ هېوادونو په ملاتړ منظمه جوړه اردو به یې ژغورلې او ساتلې وه .
سمنګانی وايي،خلک د دوی په خولې نه جګړه کوي او نه یې هم جګړه کړې او اوس افغانستان خپلواکه اردو لري.
هغه زیاته کړه:« دغو تقلبي جنرالانو که وړتیا درلوده او نران وای،هغه اردو به یې ساتلې وه،چې د سل ملیارده ډالرو په لګښت او د ۵۰ هېوادونه په مرسته ورته جوړه شوې وه او خلکو نه پرون د دوی په خوله جګړه کړې وه او نه نن د دوی په خوله جګړه کوي او اوس افغانستان د مستقل دولت او وسله وال پوځ خاوند دی.»
دوی وايي،جنرال سمیع سادات چې په افغانستان کې له ټولو امکاناتو برخمن و او صلاحیت یې درلود،څه یې وکړل چې اوس به له امریکا جګړه رهبري کړي.
د سیاسي چارو شنونکی عزیز معارج وايي:«جنرال سمیع سادات په بهر کې ناست دی او اوس له هېواده تښتیدلی دی. له هغه ځایه باټې وهي او د پخوانیو پوځیانو د بسیج او جګړې خبره کوي. دلته چې په افغانستان کې وې او ټول پوځ تاسوسره وو، امریکایان تاسو سره ول، توپ اوطیارې هم تاسې سره وې،بسیج ولې منظم نه وه، هیڅ دې هم ونه شو کړلای او له هېواده وتښتیدې.»
یو شمیر د سادات دغه خبرې ملي خیانت تعبیروي او په وینایې سادات او د پخواني پوځ نور هغه جنرالان،چې مات شوي دي، نور دې د جاسوسو کړیو په لمسون د افغانانو د اذهانو د مخشوش هڅې پریږدي.
پخوانی نظامي حکمت الله حکمت وايي:« له بهره د یو شمیر دروغجنو کړیو له لوري د بیا بغاوت او د پوځي تشکیلاتو د جوړېدو خبرې د ملي خیانت به اندازه باندې دې هېواد ته مضرې دي. زما پر دوی غږ دی،چې تیر شي له هغو جاسوسو دستورونو،چې تاسو ته یې د هېواد د ویجاړولو لپاره درکوي. راځي دا هېواد جوړ کړو، له دې پرته تاسو یو ځل له دې هېواد شړل شوي یاست او بیا به هم په کې د پښې ایښود ځای ونه لرئ.»
د سمیع سادات ترڅنګ د شمال ټلوالې ځینې غړي هم وخت ناوخت په ټولنیزو رسنیو کې د جګړې او مقاومت خبرې کوي،هغه څه چې په عملي ډګر کې یې لا څرک هم نه دی لیدلی شوی او اسلامي امارت له وړاندې د خلکو د امنیت ټینګښت او د هېواد د دفاع ډاډ ورکړی دی.
پوځي مسوولین وايي،افغانستان د ټولو ګډ کور دی،جګړه پای ته رسېدلې،د نوې جګړې لپاره هېڅ پلمه نه ده پاتې او هر هغه څوک چې د جګړې او نظام ضد فعالیت وکړي،سخت به یې وځپي.
