د پاکستان بهرنیو چارو وزیر شاه محمود قریشي ویلي، د پاکستان په اړه د افغانستان ملي امنیت شورا سلاکار حمدالله محب د وروستیو څرګندونو له امله یې هغه سره خپلې اړیکې پرې کړي دي.
قریشي ویلي، تر هغو به یو پاکستان چارواکی له تاسو سره خبرې ونه کړي او لاس به درنه کړي، ترڅو د پاکستان په اړه مو له خبرو لاس نه وي اخېستی دی.
قریشي ویلي، محب باید د پاکستان په اړه پر خپلو خبرو بیا غور وکړي او په وینا یې د هغه خبرې د سولې پر وړاندې خنډونه جوړوي.
هغه ویلي، د محب وروستیو څرګندونو په اړه یې نړیواله ټولنه هم خبره کړې.
قریشي زیاته کړې، هېواد یې افغانستان کې سولې او ثبات ته رسېدو سره ډېره مرسته کړې او مهم رول یې لوبولی دی.
قریشي دا خبرې وروسته له هغې کوي،چې د افغانستان ملي امنیت شورا سلاکار حمدالله محب تېره میاشت ننګرهار ولایت ته د خپل سفر پر مهال ویلي وو، پاکستان هیڅ عزت او ویاړ نلري.
د افغانستان حکومت او ملي امنیت شورا بیا تر اوسه پورې د قریشي تازه څرګندونو په اړه څه نه دي ویلي.
