د بهرنیو چار وزارت سرپرست مولوي امیرخان متقي ايران ته د سفر په لړ کې د دې هېواد له بهرنيو چارو وزير سیدعباس عراقچي سره د کابل او تهران ترمنځ پر مهمو مسايلو غږېدلی.
بهرنیو چارو وزارت وايي، د اړیکو پراختيا ترڅنګ امنیتي او د اوبو اړوند مسايل د دوی دواړو ترمنځ د بحث مهم ټکي وو.
د ياد وزارت په خبره، متقي د ايران او افغانستان ترمنځ د همکاريو پراختيا لپاره د ډېپلوماټيکو اړيکو د کچې لوړېدل مهم ياد کړي.
نوموړي دغه راز وړانديز کړی چې ايران دې په دې هېواد کې د افغان زندانيانو لپاره د سهولتونو رامنځته کولو ترڅنګ، د دوی تبادلې ته هم پام وکړي او دغه راز دې په ایران کې مېشت افغان کډوال هم په تدريج خپل هېواد ته ستانه کړي.
د بهرنیو چارو وزارت سرپرست مولوي امیرخان متقي وايي: « د دواړو هېوادونو اړیکې مهمې دي او په ګڼو برخو کې د همکاریو پراختیا ته په پام سره د ډېپلوماټیکو اړیکو د کچې لوړوالی یوه اړتیا ده. اسلامي امارت ژمن دی چې خپلو مهاجرو هېوادوالو ته په وطن کې د بیا مېشتېدو زمینه برابره کړي او هیله لرو چې ایران د افغان کډوالو په راګرځولو کې د تدریج اصل په پام کې ونیسي.»
په ورته مهال، د ایران بهرنیو چارو وزیر هیله ښودلې چې دوه اړخیزو اړیکو په برخه کې به تهران او کابل ګام په ګام پرمختګونه ولري او دغه اړیکې د پراختیا په حال کې دي.
سید عباس عراقچي ژمنه کړې چې افغانستان ته د افغان کډوالو بېرته تګ به تدریجي او باعزته وي او په ایران کې به لا زیاتې اسانتیاوې ورته برابرې کړي.
عراقچي په دې اړه ویلي: « هیله لرم ایران او افغانستان به د خپلو دوه اړخیزو اړیکو په نوي پړاو کې ګام پر ګام پرمختګونه ولري او زموږ اوسنۍ اړیکې د پراختیا پر لور روانې دي. د افغان کډوالو بېرته تګ باید تدریجي او باعزته وي او ژمنه کوم چې په ایران کې به افغان کډوالو ته لا زیاتې اسانتیاوې برابرې شي.»
د سیاسي چارو شنونکي د ګاونډي هېواد په توګه له ايران سره د اړيکو پراختيا د افغانستان پر ګټه بولي، خو ټينګار کوي چې د اړيکو دغه پراختيا بايد د متقابل درناوي د اصل پر بنسټ وي.
د سیاسي چاروشنونکی معین ګل څمکنی وايي: « دوی دواړو په ډېرو مسایلو بحثونه کړي، لکه د اوبو او مهاجرینو مسایل، د دوه اړخیزو اړیکو جوړول، د چابهار بندر چې هندوستان په کې سرمایه ګذاري کړې او غواړي چې د ایران له لارې افغانستان او منځنۍ آسیا ته لاره پيدا کړي، دا هغه مسایل چې په اړه یې بحثونه شوي. له موږ سره باید سیاسي اقتصادي اړیکې ټینګې کړي او موږ باید دغو اړیکو ته اهمیت ورکړو. لکه څرنګه چې د افغانستان د حکومت بهرنۍ پالیسي ده، دا باید تعقیب شي.»
په ورته مهال د ایران او تاجیکستان د بهرنیو چارو وزیرانو هم په خپلو کې د افغانستان په تړاو خبرې کړي او ورسره يې د همکاریو پر دوام ټینګار کړی.
