ولس ته د حساب ورکولو غونډه کې د هلمند مرکز لښکر ګاه ښاروالۍ مسوولین د عوایدو د زیاتوالي خبر ورکوي.
د مسوولینو په خبره، تراوسه يې ١٣٦ میلیونه افغانۍ عواید راټول کړي چې د تېر کال په پرتله ۳۶ سلنه ډېروالی ښيي.
د لښکرګاه ښاروالۍ د عوایدو مدیر زمریالی صمیم وايي: « په ۱۴۰۴ مالي کال کې زموږ ثابت او غیر ثابت عواید ۲۵۵ میلیونه افغانۍ اټکل شوي وو چې له ډلې یې موږ ۱۳۶ میلیونه افغانۍ عواید راټول کړي دي. دا عواید د تېر کال په پرتله ۳۶ سلنه زیاتوالی ښيي.»
مسوولینو په دې غونډه کې دغه راز لښکرګاه ښار کې د روانو رغنیزو پروژو په اړه هم ډاډ ورکړ او وویل، روان کال په دې ښار کې ۱۵ پروژې پلې شوې دي چې ۱۵۲ میلیونه افغانۍ لګښت پرې راغلی.
د ښاروالۍ د زېربنا او انجنیرۍ عمومي مدیر محمد عباس ځیرک وايي: « په روان ۱۴۰۴ مالي کال کې د لښکرګاه ښاروالۍ ۱۵ پروژې عملي کړې دي چې ځینې یې تکمیل شوې او ځینې نور تر کار لاندې دي. د دغو پروژو مجموعي لګښت ۱۵۲ میلیون افغانۍ دی چې په کې د سړکونو قیر اچونه، د روښنايي سیسټمونه جوړول، د پلو لارو او پلونو جوړول او د تجارتي مارکېټونو جوړول شامل دي.»
که څه هم د لښکر ګاه اوسېدونکي د ښاروالۍ له چارو خوښ دي، خو د ښار پر معیاري کېدو ټینګار کوي.
د لښکرګاه اوسېدونکی عبدالولي دورانی وايي: « د ښاروالۍ فعالیتونه د ستایلو وړ دی، خو یوه غوښتنه لرو، هغه دا چې د ښار عمومي بازار ډېر کوچنی دی، باید په دې اړه فکر وشي.»
د لښکرګاه اوسېدونکی صالح محمد رودي وايي: « موږ له ښاروالۍ غواړو چې د روانو پروژو کارونه چټک او نوې پروژې هم پلان کړي.»
د لښکر ګاه ښاروالۍ د مسوولینو په خبره، دغو پروژو کې ګڼو خلکو ته کاري زمینې هم برابرې شوې دي. د دوی د معلوماتو له مخې، اوسمهال یادو پروژو کې ۵۰۰ تنه پر کار بوخت دي.
