د لوګر مس عینک کان کېندې چارې به ژر پيل شي

باختر دولتي د کانونو او پټرولیمو وزارت په نقل سره ویلي، د لوګر ولایت مس عینک  کان تړون له (ام سي سي) چنایي شرکت سره شوی او ټاکل شوې ده، چې تر راتلونکو څو ورځو به  یې کارونه پیل شي.

د لوګر د مس عینکو کان په نړۍ کې د مسو تر ټولو ستر کان بلل کېږي.

د ارزونو پر بنسټ، په اوس وخت کې د لوګر د مسو کان د امریکا په چیلي ښار کې د مسو د کان پرتله غوره مس لري.

د کانونو او پټرولیمو وزارت وایي، د دغه کان د را ایستلو په صورت کې به هر کال افغانستان ۳۵۰ میلیونه ډالر عاید تر لاسه کوي.

د دغو مسو اندازه ۲۴۰ میلیونه ټنه ښودل شوې او بیه یې ۵۰ میلیارده ډالر اټکل شوې ده.

تر دې وړاندې هم د لوګر د مس عینکو کان د راایستلو خبرونه ورکړل شوي، خو د بېلابېلو لاملونو له امله یې کار ځنډول شوی وو.