قطر چې د اسلامي امارت لپاره یې دوحه کې رسمي دفتر پرانېست او د امریکا او اسلامي امارت ترمنځ یې د سولې مذاکراتو ۱۸ میاشتې کوربتوب وکړ، د افغانستان ستونزې یوازینی حل ډیالوګ او خپل منځي خبرې بولي.
د یاد هېواد د بهرنیو چارو وزیر شیخ محمد بن عبدالرحمن آل ثاني په یوه مرکه کې ویلي،له خپل منځګړيتوب پښیمانه نه دي.
هغه زیاته کړې:« موږ به هېڅ کله هم د یوه منځګړي یا د خبرو مرسته کوونکي په توګه پښیمانه نشو،ځکه ټولې ستونزې،چې موږ وینو د حل لپاره یې د یو چا سره خبرو ته اړتیا وي. افغانستان کې د اوسني وضعیت لپاره بل بدیل څه دی؟ ایا کورنۍ جګړه ده؟ دا د حل لا نه ده. موږ د داسې حل لارې په لټه کې وو،چې د ډیالوګ او درک په مرسته وي، د ټولو اندېښنې په کې ځواب او د دې ډاډ مو تر لاسه کړی وي،چې د ټولو او په ځانګړي ډول د ښځو حقونه په کې خوندي وي.»
شیخ محمد د اسلامي امارت د وروستیو پریکړو په تړاو ویلي، وضعیت له نږدې څاري او د ښځو او نجونو پر وړاندې یې د هغوی وروستۍ پریکړې خواشینونکې بللې دي.
آل ثاني ویلي،چې دا پریکړې هېڅ دیني او کلتوري اړخ نه لري.
هغه زیاته کړې:«موږ هلته وضعیت،د طالبانو فعالیتونه او پریکړې له نږدې څارو،چې زموږ له نظره ډېرې زړه بوږنونکې او ناهیلې کوونکې دي. موږ هڅه کوو،چې له طالب مشرانو سره په دې موخه خبرې وکړو،چې پوه شوو د دې پریکړو تر شاه څه دي،ځکه موږ داسې کوم څه نه وینو،چې دا دې له دیني یا کلتوري اړخه د منلو وړ پرېکړې وي.»
په ورته وخت کې دغه قطري چارواکي ویلي،د اسلامي امارت ځینې چارواکي چې دوی سره اړیکه کي دي میانه روي دي،خو په عمل کې یې بیا نه ده ثابته کړې.
هغه ویلي، د بېلا بېلو لارو او له اسلامي هېوادونو سره یې پراخه مشورې پیل کړي او هڅه کوي،اسلامي امارت خپلې وروستۍ پریکړې بېرته واخلي.
دغه راز ال ثاني ویلي،که د اسلامي امارت پریکړې پر خپل ځای پاتې شي،وضعیت به لا زیات کړکیچن شي.
هغه زیاته کړې:«دغه پرېکړې زموږ لپاره د تعجب وړ نه دي،خو موږ له طالبانو سره خبرې کوو او له دوی سره اړیکه کې یوو، په ځانګړې ډول له هغو چارواکو سره چې موږ ورسره اړیکه کې یو میانه روي یې ښودلې،خو په عمل کې یې نه ده ثابته کړې. موږ د دې پرېکړو په لاملونو نه پوهیږو،خو ویلی شم،چې دا به د دوی او ټولو افغانانو لپاره وضعیت لا زیات خراب کړي.له دغو پریکړو وروسته اوس تازه بیا موږ د بېلا بېلو لارو هڅې پیل کړي دي،چې له طالبانو سره خبرې وکړو او ان د نورو اسلامي هېوادونو سره په ګډه مو دا هڅې روانې دي،چې له دوی سره خبرې وکړو او د مسلمانو هېوادونو سره مو په دې تړاو مشورې پیل کړې دي،چې حداقل د دې وضعیت لپاره یو پلان جوړ کړو،ځکه موږ باور لرو او فکر کوو،چې موږ غوره هېوادونه یوو،چې له دوی سره خبرې کولی شو او د طالبانو د دا ډول پریکړو مخه ونیسو یا حد اقل دا مرسته وکړو،چې دوی خپلې پریکړې بېرته واخلي.»
دا لومړی ځل نه دی،چې نړیوال د اسلامي امارت د وروستیو بندیزونو په تړاو اندېښنې ښيي،بلکې له دې وړاندې هم د دغو پریکړو د بېرته اخیستو غوښتنه شوې،خو لا هم په ځای پاتې دي. شیخ محمد بن عبدالرحمن ال ثاني خپلو وروستیو څرګندونو کې د افغان ښځو د هر اړخیزه ملاتړ ژمنه کړې او ویلي دي،چې دهغوی د ملاتړ لپاره به له هېڅ ډول مرستو دریغ ونه کړي.
اسلاميامارت تر اوسه پورې د ال ثاني څرګندونو ته کوم غبرګون نه دی ښودلی، خو د سعودي عربستان په کوربتوب یې د اسلاميهمکاریو سازمان د وروستۍ ناستې له اعلامیې هرکلی وکړ او د اسلامي هېوادونو اندېښنې یې د درک وړ وبللې.
