د قزاقستان د لوموړي وزیر مرستیال سریک ژومانګارین پر مشرۍ یو لوړ پوړی پلاوی په رسمي سفر افغانستان ته کابل ته راغلی دی.
ژومانګارین له رسنیو سره په خبرو کې ویلي، غواړي د سې شنبې په ورځ د افغان- قزاق ګډ نندارتون په کابل کې پرانيزي او له ځان سره راوړی سوداګریز تړون د ریاست الوزرا له اقتصادي معاونیت سره شریک کړي.
نوموړی دغه راز ویلي، هڅه کوي د قزاقستان له لارې د افغانستان او چین ترمنځ د اتصال مسیر ته هم لار هواره کړي.
ژومانګارین زیاته کړې: « دا زموږ څلورم سفر دی چې قزاقي پلاوی افغانستان ته راځي. دا ځل به هم د سوداګرۍ وزیر په ګډوڼ له ګڼو افغان چارواکو سره ګټورې لیدنې کتنې ولرو او ترڅنګ به یې د افغان- قزاق سوداګریزو توکو ګډ نندارتون هم دلته دایر کړو. موږ هیله لرو وکولی شو هر کال دوه ځله افغانستان ته سفر وکړو. سربېره پر دې، موږ یو مهم سوداګریز تړون چمتوو کړی چې د ریاست الوزرا اقتصادي معاونیت ته به وړاندې شي. موږ دغه راز هیله لرو چې دغه سفرونه وکولی شي د دواړو هېوادنو ترمنځ د اړیکو په پراخېدو کې مثبت رول ولوبوي.»
د صنعت او سوداګرۍ وزارت سرپرست د قزاقي پلاوي د سفر اصلي موخه د افغان- قزاق ګډ نندارتون جوړول او د دوه اړخیزو سوداګریزو او اقتصادي همکارۍ پراخول یادوي.
نورالدین عزیزي وايي، د دواړو هېوادونو ترمنځ اړیکې په ښه حالت کې دي چې په خبره يې افغانستان دامهال دغه هېواد ته صادرات کوي او په راتلونکي کې به کاني محصولات هم دې هېواد ته صادر کړي.
عزیزي زیاتوي: « د تجارتي تواصل دغه کنفرانسونه یا بي ټو بي او نندارتونونه موږ په افغانستان کې ترتیب کړي او هم د قزاقستان په پلازمېنه آستانه او آلماتا ښارونو کې نندارې ته وړاندې شوي. دا به انشاالله ادامه ولري.»
د صنعت او سوداګرۍ وزارت سرپرست دغه راز وايي، هڅه کوي له قزاقستان سره د سوداګرۍ کچه ۳ میلیارده امریکايي ډالر او تر هغې هم لوړه کړي.
نورالدین عزیزي زياتوي، د دواړو هېوادونو ترمنځ د اړیکو د پراختیا کافي ظرفیت موجود دی او دا مهال افغانستان خپلې ډېری اړتیاوې له دې هېواده پوره کوي.
د صنعت او سوداګرۍ وزارت سرپرست په دې اړه وايي: « هغه ښه نیت چې د دواړو هېوادونو او ملتونو ترمنځ شته دی، له امله یې په بازارونو کې پرېماني ده او هم قېمتونه راټیټ شوي دي. ما ژمنه کړې چې دغه سوداګرۍ تر ۳ میلیاردو ډالرو یا له دې هم پورته کړو. دا مهال زموږ څښاک توکي او صنعتي مواد قزاقستان ته صادرېږي او هڅه کوو چې د کرنیزو او کاني موادو په برخه کې هم قزاقستان ته صادرات ولرو.»
دا په داسې حال کې ده چې د قزاقستان د لومړي وزیر مرستیال سریک ژومانګارین وايي، تېر کال د دواړو هېوادونو ترمنځ سوداګري شاوخوا یو میلیارد ډالرو ته رسېده چې په خبره يې دغه کچه په دې وروستیو کې د ځینو لاملونو له کبله راټيټه شوې ده.
