د پاکستان پوځي رژیم له خوا په افغانستان کې د بریدونو پر مهال د ملکي وګړو او عامه تاسیساتو د هدف ګرځولو په دوام، وړمه شپه پوځي رژیم په کابل کې د روږدو کسانو د درملنی روغتون هدف وګرځاوه او یو ځل بیا یې نه بښونکی بشري جنایت ترسره کړ.
د روږدو کسانو خواخوږي او دوستان چې د تېرې شپې له برید وروسته د امېد روغتون مخې ته راټول شوي وايي، د دوی د کورنیو ځینې غړي چې په دې روغتون کې بستر وو، تمه وه چې په نږدې راتلونکي کې له روغتونه رخصت او د خپلې کورنۍ ګرمې غېږې ته راستانه شي.
راټول شوي خلک وايي، دوی اوس په دې نه پوهېږي چې امېد روغتون کې د دوی د کورنۍ بسترغړي ژوندي دي او که په برید کې شهیدان شوي.
د دوی په خبره، د پاکستان پوځي رژیم په دې وحشیانه برید سره هر څه له منځه یوړل، هغه څه چې پاتې دي یوازې خاورې او د دوی د خپلوانو خاطرې دي.
د یوه ورک ناروغ د کورنۍ غړی ولي محمد وايي: « زموږ د کورنۍ قرباني عبدالرحمان نومېده، د پلار نوم یې شمس الدین دی. دوې میاشتې کېدې چې په دې روغتون کې بستر و. خبر شوم چې ناځوانه پاکستان د شپې په تیاره کې پر روغتون بمبار کړی او زموږ ځوانان یې له منځه وړي.»
د یوه قرباني شوي ناروغ د کورنۍ غړی هارون وايي: « زما پلار له تېرو ۳ اوونیو راهیسې دلته بستر و، تر اوسه یې د مړي او ژوندي درک نه شته. راغلی یم چې مړی یا ژوندی یې پيدا کړم.»
بله خوا، د یو شمېر ټپي شویو ناروغانو د کورنۍ غړي وايي، د ټپیانو حالت نازک دی او جدي پاملرنې ته اړتیا لري.
د دوی په وینا، د پاکستان پوځي رژیم کړنې له اسراییلو سره هېڅ راز توپیر نه لري، ځکه د دوی په وینا د روژې په مبارکه میاشت کې کافر هم داسې کار نه کوي.
دوی د پاکستان پوځي رژیم په وروستیو بریدونو کې د ملکي وګړو شهادتونو ته په اشارې ټینګار کوي چې د خپلو شهیدانو د غچ اخستلو او د هېواد له ځمکنۍ بشپړتیا څخه دفاع لپاره چمتو دي چې د اسلامي امارت سره اوږه په اوږه ودرېږي.
د یوه ټپي ناروغ د کورنۍ غړی مجیب وايي: « دلته زما ورور بستر و او په دې برید کې سخت ژوبل شوی. موږ ټول ډېر ځورېدلي یو.»
د یوه ورک شوي ناروغ د کورنی غړی آدم خان وايي: « زه ۷۰ کاله عمر لرم، خو غواړم همدا نن له پاکستان سره جګړې ته لاړ شم. د افغانستان ټول ولس ښځې او نر له پاکستان سره جګړې ته چمتو دي.»
د هغو ناروغانو خواخوږي چې په دې برید کې ورک شوي، د پاکستان پوځي رژیم دا برید له انساني اصولو او د ملګرو ملتونو له منشور سره په ټکر کې بولي. دوی له اسلامي امارت غواړي چې د دې برید غچ دې واخلي.
دوی له ملګرو ملتونو هم غواړي چې پاکستان دې د دې برید په اړه ځواب ویلو ته اړ باسي او فشار پرې راوړي چې په راتلونکي کې د دا ډول بریدونو مخنیوی وشي.
