د فراه یو تن قومي مشر حاجي آغاجان وايي:« موږ تعلیم او تربیې ته ډېره اړتیا لرو. نور ترهغه را په دې خوا ترسړک او هرڅه موږ ته د بخش آباد بند مهم دی. موږ اوس د فراه له ناوه تر دغه ځایه پرلسو کورو یو اینچ اوبه نلرو.»
د فراه د بالابلوک ولسوالۍ یو تن قومي مخور عبدالوکیل وايي:« که د بخش آباد بند جوړ شي، د حاجي سناتور صاحب خبره دا نیم افغانستان ته غله او نور بخش آباد بند او فراه ورکوي. زموږ هیله او آرزو دغه ده،چې د نورو چارو ترڅنګ دغه کار باید تاسي ډېرجدي ونیسئ.»
د فراه قومي مخور وايې، اوس چې جګړه پای ته رسیدلي،په کار ده،چې حکومت د لویو ملي پروژو چارو عملي کیدو او د وطن د ودانولو لپاره لاس په کارشي.
فراه کې یوشمیر مدني فعالان بیا وايي، که چیري دغه بند جوړ شي، زرګونه کسانو ته به د کار زمینه برابره او بهر ته به د ځوانانو له تګه مخنیوی وشي.
د فراه یو تن مدني فعال دلاور حمیدزی وایي:«په سلګونه ځوانان د پولې ها غاړې ته اوړي، څوک ایران ته ځي، څوک پاکستان ته ځي. دغسي تر اروپا پوري اوږدیږي. د دې لوی لامل بیکاري ده، که چېرې دلته ځوانانو ته د کار زمینه برابره شي، ان شآءالله زموږ یو ځوان هم لیوالتیا نه لري،چې هغه بهرته ولاړ شي.»
اخوا د فراه ولایت ځايي چارواکي د فراه ولسونو او قومي مخورو ته ډاډ ورکوي،چې غوښتنې به يې له مرکزسره شریکي او د بند د عملي چارو پیل کولو په اړه به اقدام کوي.
د فراه مرستیال والي مولوي عبدالصمد وايي:« خط راکړه ، پلاني ته تلیفون وکړه، هغه ته موږ چمتو یو، اوله ورځ هم موږ ویلي وه،چې کار باید ونه دریږي. لږ چې شروع شي، بیا مشکل حل دی،خو موږ په خدمت کې یو.»
د بخش آباد بند چې د فراه بالابلوک ولسوالۍ کې جوړیږي،تیرحکومت کې يې د ډیزاین چارې بشپړې او ځینو نورو برخو باندي يې کار روان و او د نوي حکومت په راتګ سره د دغه بند د جوړیدو چارې ودرول شوې.
د مالوماتو له مخې،د بخش آباد بند په جوړیدو سره به ۱۳۶۴ ملیون متره مکعبه اوبه زیرمه ۲۷ میګاواټه بریښنا به تولید او ۶۸ زره هکتاره ځمکه به خړوبه کړي.
د فراه اوسیدونکي په داسي حال کې د بخش آباد بند د جوړیدو غوښتنه کوي،چې سږکال د وچکالیو له امله کروندګرو ته سخت زیانونه اوښتي او د کرنیزو محصولاتو کچه راټیټه شوې ده.
