د ایران په پوله پروت شیخ ابو نصر فراهي بندر ته پرغځېدلې لاره هره ورځ زیات شمېر بار وړونکي او کوچني موټر تګ راتګ کوي، خو د ویجاړۍ له امله یې د دغه ولایت پشت کوه ولسوالۍ اوسېدونکي او د لارې موټر چلوونکي له ستونزو سره مخ دي.
د دوی په خبره، د دغې لارې د رغولو چارې شاوخوا ۱۸ کاله وړاندې پیل شوې، خو لا هم نه ده رغول شوې.
د فراه اوسېدونکی محمد نبي وايي: « پشت کوه یوه لرې پرته ولسوالي ده. ډېرې ستونزې لري، خو تر ټولو مهمه یې د سړک خراب والی دی. د دې سړک کارونه ۱۸ کاله وړاندې پيل شول خو هېڅ پرمختګ نه لري.»
د فراه پشت کوه ولسوالۍ چارواکي هم د دغې لارې له امله د اوسېدونکو ستونزې مني او له مرکزي حکومت غواړي، چې د رغولو لپاره يې جدي ګامونه پورته کړي.
د پشت کوه ولسوال محمد ناصر نوراني وايي: «دا لاره مهمه ده، ځکه چې له بندر څخه راتلونکي تجارتي مالونه په همدې لاره راځي، خو له بده مرغه د رغونې کارونه یې پڅ روان دي. موږ له مرکزي چارواکو غوښتنه کوو، چې کارونه یې چټک کړي.»
بله خوا د فراه ځایي چارواکي وایي، د شیخ ابونصر فراهي بندر ته غځېدلې لارې په ګډون ټولو لرې پرتو ولسوالیو ته د غځېدلو لارو بیا رغونې لپاره کمېټه جوړه شوې او اوسمهال د یو شمېر ولسوالیو پر لارو د جغل اچونې چارې هم روانې دي.
د فراه والي ویاند عبدالمالک اسامه وايي: « د اوبو نصر فراهي بندر ته د غځېدلې لارې څه کارونه تېرمهال ترسره شوي او په پاتې یې کار روان دی. د فراه ولایت ټولو ولسوالیو ته د مواصلاتي سړکونو د رغونې ځانګړې کمېټه جوړه شوې او تمه ده، چې نږدې راتلونکې کې ټول سړکونه په اساسي ډول جوړ شي.»
د شیخ ابونصر فراهي بندر ته غځېدلې لار دا مهال د هېواد له هغو لارو ګڼل کېږي، چې په لویه کچه واردات او صادرات پرې روان دي.
موټر چلوونکي هم د لارې له خرابوالي شکایت لري او پر چارواکو غږ کوي، چې د وارداتو او صادراتو د چټکتیا لپاره د لارې رغونې ته پاملرنه وکړي.
