شاوخوا یوه میاشت وړاندې د ترکيې په استانبول کې د ۱۹ هېوادونو شرکتونو ترمنځ د غاليو نندارتون ترسره شو چې په کې د افغانستان غاليو د کلاسیک ډیزاین له پلوه لومړی مقام خپل کړ.
دلته د غاليو توليدوونکو او صادروونکو اتحاديې غړي را ټول شوي او هغه شرکت ستایي چې په ياد نندارتون کې يې د غاليو کلاسيک ډيزاين له پلوه لومړی مقام ګټلی و.
د يادې اتحاديې غړي وايي، د افغانستان غاليو په وار وار په نړیوالو نندارتونونو کې لومړی مقام ګټلی، خو یو شمېر ستونزې يې پر وړاندې پرتې دي چې حکومت باید ورته جدې پاملرنه وکړي.
دوی زياتوي، د صنعتي پارک نه شتوالی د خامو موادو کمښت او د ټرانزیټې لارو بندښت هغه ستونزې دي چې د غاليو توليدوونکي او پلورونکي ورسره لاس او ګرېوان دي.
د غاليو توليدوونکو او صادروونکو اتحاديې مرستیال قربان علي جمشېد زاده د دې اتحادیې غوښتنې دا ډول مطرح کوي: « د غالۍ اوبدونکو لپاره د صنعتي او استوګنیزو ښارګوټو جوړول، له هوايي دهلېزونو ملاتړ، ترڅو د افغانستان غالۍ په خپل وخت، روغه بڼه او ټیټه بیه نړیوالو بازارونو ته ورسېږي. د ډیزاین زده کولو لپاره د نړیوالو مرستو جبول او د هېواد په پوهنتونونو کې د غالۍ اوبدلو د پوهنځي رامنځته کول.»
د افغانستان او پاکستان د سوداګرۍ ګډې خونې رییس خان جان الکوزی وايي: « تاسو دا نمایشي کارونه مه کوئ، بس دی چې هغو نورو دا وکړل. ځمکه راکړئ، نه یې په اجاره غواړم او نه یې په اجاره اخلم او دا د مشرتابه امر دی چې باید ۱۸۰ زره جریبه ځمکه صنعتکار ته ورکړل شي.»
ياده اتحاديه غوښتنه کوي چې حکومت دې د هوايي دهلېز له لاري ورته اسانتياوې برابرې کړي، ترڅو وطني غالۍ اروپايي بازارونو ته صادرې کړي.
په ورته مهال د کرنې وزارت مسوولان وايي، دې وزارت ۷۲ زره هکټاره ځمکه صنعتي پارکونو ته ځانګړې کړې او چمتو دی چې د غاليو توليدوونکو او صادروونکو اتحاديې ته یې په اجاره ورکړي.
دوی زياتوي، افغانستان د مالدارۍ په برخه کې ځان بسیاینې ته نږدې شوی او په دې برخه کې د فعالو ټولو سوداګرو ستونزو ته بېړنۍ رسېدنه وکړي.
د کرنې، اوبو لګولو او مالدارۍ وزارت ویاند شېر محمد حاتمي وايي: « له ۷۲ زرو جریبو زیاته ځمکه کورنیو او بهرنیو سوداګرو او پانګوالو ته د پانګونې په موخه چمتو شوې او تړون یې هم لاسلیک شوی دی.»
د غاليو توليدوونکو او صادروونکو اتحاديې د معلوماتو له مخې، اوس مهال په ټول افغانستان کې یو میلیون زیات کسان د غاليو په اوبدلو بوخت دي چې۸۰ سلنه يې مېرمنې دي.
دغه اتحاديه له حکومت دا هم غواړي چې ګاونډیو هېوادونو ته دې د هغو وطني غاليو د لېږد مخه ونيسي چې له پروسېس مخکې ور وړل کېږي او بيا يې ياد هېوادونه په خپل نوم نړيوالو بازارونو ته وړاندې کوي.
