د طالبانو د سیاسي دفتر اته تنه غړي له دندو ګوښه شوي خو طالب ویاند دغه خبر تائید نه کړ.
یوې سرچینې شمشاد ته ویلي چې په کوېټه، وزیرستان او دوحه کې د طالبانو ترمنځ د راپورته شوې ستونزې له امله د قطر دفتر اته تنه غړي له دندې ګوښه شوي دي .
سرچینه وایي، دغه کسان د طالبانو مخکینیو وژل شویو مشرانو ملامحمد عمر او ملامنصور ته نږدې او ژمن کسان وو .
سرچینه وایي داسې انګېرل کېږي چې دغه بدلون د قطر په سیاسي دفتر کې د حقاني شبکې د استازیتوب د قوي کېدو په موخه شوی ځکه حقاني شبکې ویلي په سیاسي دفتر کې د دوی رول کم دی او که خبره یې و نه منل شي بریدونو ته به دوام ورکړي.
طالبان بیا دغه مسله نه تاییدوي خو وايي چې تغیر او تبدیل عادي کار دی او د چارو د لاښه سمبالښت په موخه ادلون بدلون ترسره کیږي .
طالب ویاند ذبیح الله مجاهد شمشاد ته داسې وویل (( په سیاسي دفتر کې د ادلون بدلون په اړه مالومات نه لرم او دغه مسله نه شم تاییدولی خو بیا هم تغیر او تبدیل په نظام کې عادي چاره ده د کارونو د لا ښه سمون لپاره به ترسره کېږي.))
د طالبانو د قطر دفتر مطبوعاتي څانګه بیا دغه مسله نه رد او نه تاییدوي او وايي په دې اړه ورته تر اوسه مالومات نه دي ورکړل شوي.
ملا داوود ، ضیاالرحمان مدني ، ډاکټر صالح جهانګیر وال ، قاضي سعید جان ، ملا سید رسول ، مولوي جان محمد مدني ، او شیخ محمد رسول هغه کسان دي چې د سرچینې په باور د طالبانو د قطر دفتر استازولي یې له لاسه ورکړې ده.
