طالبان وایي، په وروستیو جګړو کې یې هغه سرحدي سیمې او سوداګریز بندرونه نیولي، چې له ترکمنستان هېواد څخه پرې سوداګریزې راکړې ورکړې ترسره کیږي او د پلاوي سفر یې هم په همدې موخه ترسره شوی چې ترکمنستان ته ډاډ ورکړي، چې له افغانستان سره به یې سوداګري ټکنۍ نه شي.
د طالبانو ویاند ذبیح الله مجاهد وايي: « ترکمنستان ته زموږ د پلاوي د سفر موخه دا ده، چې له هغوي سره سرحدي سیمې موږ نیولي دي او همداراز ابو نصرفراهي او تور غونډۍ سوداګریز بندرونه مو هم نیولي دي. اوس ترکمنستان ته د ډاډ لپاره دا سفر ترسره کېږي، چې د دغه هېواد او افغانستان ترمنځ سوداګریزې اړیکې زیانمنې نه شي او لا پسې پیاوړې شي.»
بل پلو د سیاسي چارو یو شمېر تحلیل کوونکي بیا په دې اند دي، چې د طالبان له لوري د جګړې زیاتوالی او د سیمې هېوادونو ته یې د سیاسي پلاوي سفرونه په دې موخه ترسره کېږي، چې د راتلونکي لپاره د دغو هېوادونو ملاتړ ترلاسه او هغه غونډې چې د سولې په تړاو جوړېږي په کې برلاسه وي.
د باور غورځنګ مشر نجیب ازاد وايي: « طالبانو غوښتل چې د جګړې په ډګرکې خپل قوت وښي، چې دا کار یې وکړ او د سیمې هېوادونو ته هم دغه سفرونه په همدې موخه ترسره کېږي، چې طالبان په راتلونکو هغو ناستو کې د افغان سولې په تړاو جوړېږي د دغو هېوادونو ملاتړ له ځان سره ولري.»
یو شمېر بیا په دې باور دي چې طالبان له فرصته ګټه اخلي او د سیمې هېوادونو سره د خپلو اړیکو د پراختیا په موخه یې ایران، روسیې او ترکمنستان هېوادونو ته سفرونه کړي.
د پوهنتون استاد ذاکر جلالي وايي: « په دې وروستیو کې طالبانو یو شمېر سوداګریزې سرحدي سیمې او بندرونه نیولي او اوس دوي غواړي، چې ترکمنستان ته ډاډ ورکړي چې د طالبانو له لوري ورته هېڅ ډول امنیتي ستونزه نه پيښېږي. طالبان په دې لټه کې دي چې د سیمې له هېوادونو سره خپلې اړیکې پراخه کړي.»
له دې سفره یوازې څو ورځې وړاندې په قطر کې د طالبانو د سیاسي دفتر یو پلاوي مسکو او تهران ته هم سفرونه درلودل، چې موخه یې د سولې په تړاو خبرې ښودل شوې وې، خو په کور دننه باور دا دي چې په یو وخت د جګړې دوام او د سولې فرعي ناستې د افغانستان سولې بهیر سره مرسته نه شي کولی.
