د قطر په پلازمېنه دوحه کې د طالبانو او امریکایانو شپږم پړاو خبرې پیلېږي.
طالب ویاند ذبیح الله مجاهد پر ټویټر لیکلي، نن چارشنبه د عیسوۍ میاشتې لومړۍ نېټه به د قطر په دوحه کې د طالب استازو او امریکایانو ترمنځ د مذاکراتو شپږم پړاو پیل شي.
دا خبرې داسې مهال پیلېږي، چې په کابل کې د سولې مشورتي لویه جرګه کې شاوخوا ۳۲۰۰ کسان له طالبانو سره د سولې په تړاو سلامشورې کوي، چې څنګه کولی شي جګړه ختمه او سوله راشي.
له دې سره طالبانو ويلي، د طالبانو د سیاسي چارو مرستیال ملا برادر د اندونیزیا د بهرنیو چارو له وزیرې ریتنو لیستاري او ورسره پلاوي سره لیدلي او له امریکایانو سره د سولې خبرو پر روان بهیر یې ورسره خبرې کړي دي.
په تېره مارچ میاشت کې قطر کې د طالبانو او امریکایي چارواکو تر منځ د افغان سولې خبرې لسمې ورځې ته غځېدلې وې.
امریکا په افغانستان کې دوه موخې لري
د امريکا د بهرنيو چارو وزير مايک پمپيو وايي، داعش او القاعده شبکې سره مبارزه يې په لومړيتوبونو کې ده او پر وړاندې يې مبارزې ته دوام ورکوي.
پمپيو ويلي، امريکا د افغانستان جګړې د پايته رسولو په موخه په سياسي حل لاره ټينګار کوي.
مايک پمپيو دا خبرې په داسې مهال کې کړې ، چې تازه بهرنيو رسنيو او د روسيې د دفاع وزير ويلي، چې داعش جنګيالي افغانستان ته د تګ په حال کې دي.
پمپيو ويلي، هېواد يې نه غواړي له افغانستان ورته امنيتي ګواښونه متوجه شي.
داسې هېڅ ثبوت نشته چې ښکاره کړي هند له افغانستان خاورې ناوړه ګټه اخلي
امریکا ويلي، داسې هیڅ نښه یې نه ده لیدلې چې وښيي هند د افغانستان له خاورې د پاکستان پر ضد کار اخلي.
د جنوبي او منځنۍ اسیا لپاره د امریکا د بهرنیو چارو وزارت مرستیالې الیس ویلز تیره ورځ د پاکستاني رسنیو سره په مرکه کې ویلي، داسې هیڅ شواهد نه ویني چې هغه څه ثابت کړي چې پاکستان ورته اشاره کوي.
ویلز دغه خبره د هغې پوښتنې په ځواب کې کړې چې هند د افغانستان له خاورې په پاکستان کې د کړکېچ رامنځته کولو لپاره د ځینو ډلو ملاتړ کوي.
تر دې وړاندې د پاکستان پوځ تور پورې کړی و چې د افغانستان د ملي امنیت ریاست او د هند استخباراتي اداره (را) د پښتون ژغورنې غورځنګ ملاتړ کوي.
الیس ویلز ویلي، د سیمې هیوادونه باید د یو بل ملي حاکمیت ته درناوی ولري او د دې لپاره چې په سیمه کې سوله او اقتصادي پرمختګ رامنځته شي، باید په ګډه کار وکړي.
